लिओनेसालाई पराजित गर्दै बार्सिलोना नकआउट चरणमा

एजेन्सी- बार्सिलोना कोपा डेल रे मा दोस्रो श्रेणीको कल्चरल लिओनेसालाई पराजित गर्दै अन्तिम १६ मा प्रवेश गरेको छ । बुधबार राती भएको खेलमा बार्सिलोनाले घरेलु मैदानमा ४-१ को फराकिलो अन्तरले पराजित गर्दै नकआउट चरणमा प्रवेश गेरेको हो । 

बार्सिलोनाको जितका लागि डेनिस सुआरेजले दुई गोल गरे । त्यस्तै माल्कम र मुनिर एल हद्ददीले १-१ गोल गरे । मुनिरको गोल मार्फत बार्सिलोनाले खेलको १८ औं मिनेटमा अग्रता लिएको थियो । 

बार्सिलोनाको दोस्रो गोलमा पनि राकीटिचकै असिस्ट रहयो । २६ औं मिनेटमा उनले दिएको पासलाई डेनिस सुआरेजले शक्तिशाली प्रहार गर्दै गोल गरे । ४३ औं मिनेटमा राकीटिचको क्रसमा माल्कमले हेडरमार्फत गोल गर्दै पहिलो हाफमा बार्सिलोनाले ३-० को अग्रता लिएको थियो । 

लिओनेसाले ५४ औं मिनेटमा गोल फर्काउँदै खेलमा फर्कने आशा जगायो । ७० औं मिनेटमा बार्सिलोनाका लागि सुआरेजले पुन व्यक्तीगत दोस्रो गोल गर्दै अग्रता ४-१को कायम गरे । 

राकीटिचले सिजनकै उत्कृष्ट प्रदर्शन गर्ने क्रममा यस खेलमा तीन असिस्ट दिए । लगातार पाँचौपटक उपाधि जित्ने सुरमा रहेको बार्सिलोनाले अब लिगमा शनिबार एस्पान्योलसँग खेल्नेछ ।