हिजबुल्लाह प्रमुखले भने - इजरायल विरुद्धको आक्रमण हमासको 'समर्थन मोर्चा' हो

काठमाडौं - लेबनानी मिलिसिया समूह हिज्बुल्लाहका प्रभावशाली नेता हसन नसरल्लाहले आफ्नो समूहले गत हप्तादेखि इजरायलविरुद्ध आफ्नो आक्रमणलाई तीव्र पारेको र दक्षिणी लेबनानबाट आक्रमण जारी रहने बताएका छन्।  

उनले यसलाई हमास समूहको 'समर्थन मोर्चा' भएको टिप्पणी गरेका छन्। 

इजरायल-हमास युद्ध सुरु भएदेखियता दोस्रो पटक आफ्ना समर्थकहरूलाई सम्बोधन गर्दै उनले हिजबुल्लाह- जसलाई बेलायत, अमेरिका र अन्यले आतंकवादी संगठन मानेको छ,  इजरायली क्षेत्रभित्र गहिरो प्रहार गरिरहेको बताएका हुन्। उनले इजरालविरुद्ध विस्फोटक ड्रोन र हतियारहरू र  ३०० देखि ५०० किलोग्रामका विस्फोटक पेलोड भएको मिसाइल प्रहार भएको बताएका हुन्। 

इजरायल र हिजबुल्लाहबीच एक महिना भन्दा बढी समयदेखि उनीहरूको सीमामा लगभग हरेक दिन गोलीबारी भइरहेको छ। तर अहिलेसम्म, अधिकांश आक्रमणहरू सैन्य साइटहरू र खुला मैदानहरूमा समावेश छन्।

गत हप्ता आफ्नो पहिलो भाषणमा नसरल्लाहले इजरायली सेनालाई देशको उत्तरी सिमानामा व्यस्त राखेर गाजामा हमासलाई मद्दत गर्न हिज्बुल्लाहले पहिले नै पर्याप्त काम गरिरहेको बताएका थिए। 

आफ्नो टेलिभिजन भाषणमा नसरल्लाहले इराक र सिरियामा अमेरिकी अड्डाहरू विरुद्ध मिलिसियाहरूले हालैका आक्रमणहरू साथै यमनमा हुथी विद्रोहीहरूले गरेको आक्रमणको बारेमा पनि उल्लेख गरेका छन्।