‘ए’ डिभिजन लिग : थ्रीस्टारविरुद्ध मनाङ उत्रिदै

काठमाडौं- आज (बिहिबार)बाट तेस्रो चरणका खेलहरु सुरु हुन लागेको पल्सर सहिद स्मारक ‘ए’ डिभिजन लिग अनर्तगत तेस्रो चरणको सबैभन्दा रोमाञ्चक भिडन्तमा मनाङ मस्र्याङ्दी क्लब र रुस्लान थ्री स्टार क्लबको खेल हुने भएको छ । लिग उपाधि दाबेदारका रुपमा हेरीएको यि दूबै टोली आज भिड्न लागेका हुन् ।

खेल सातदोबाटोस्थित एन्फा कम्प्लेक्समा दिउँसो २:३० बजे सुरु हुनेछ । दुई खेल खेल्दा दुबै खेलमा जित निकालेका यि टोली, यो खेलमा कस्ले जित्ला भन्ने कौतुहलता भएको छ । 

थ्री स्टारले प्रतियोगिताको लय समात्दै गर्दा मनाङलाई भने स्टार खेलाडी खेलैपिछे घाइते हुनुले संकटमा परेको छ । तेस्रो चरणसम्म आईपुग्दा मनाङलाई खेलाडीको चोटले सताएको छ । मनाङका कप्तान तथा मिडफिल्डर सुजल श्रेष्ठ र प्रकाश बुढाथोकी चोटका कारण केही साता मैदान बाहिर रहेका छन् । 

दोहोरो पहेलो कार्डका कारण ओलावाले अफिजले थ्री स्टारविरुद्वको खेल गुमाउनेछन् । ओलावाल लिगका सर्वाधिक गोलकर्ता समेत हुन् । यता, थ्री स्टार कप्तान बिक्रम लामाको आगमनसँगै लयमा देखिएको छ । राष्ट्रिय टिमका खेलाडीले भरिएको थ्री स्टारले मनाङविरुद्वको खेल गुमाउन नसकिने बताएको छ । 

त्यस्तै बिहिबार हुने पहिलो खेलमा च्यासल युथ क्लब र न्युरोड टिम एनआरटीबीच प्रतिस्पर्धा हुदैछ । एन्फा कम्प्लेक्समा बिहान ११ बजे सुरु हुने खेलमा दुवै टोली पहिलो जितको खोजिमा हुनेछन् । दुवै टोलीले एक खेलमा बराबरी र एक खेलमा हार ब्यहोर्दै च्यासल नवौ स्थानमा रहदाँ एनआरटी १० औ स्थानमा छ ।