म्युजिक भिडियोमा रुचाइएका सपुतलाई फाप्ला फिल्म ?

अहिलेका उम्दा गायक प्रकाश सपुत फिल्म ‘परदेशी २’ बाट नायकका रुपमा उदाउँदै छन्। फिल्मको प्रदर्शन मिति नजिकिँदै गर्दा उनी फुरुंग छन्। गायन करिअरको शिखरमा रहेकै बेला सपुतको ‘हिरो’ बन्ने सपना पनि पूरा हुँदैछ।

गायकका रुपमा उनी जति सफल छन्, अभिनयमा पनि उसरी नै आफूलाई उतार्न सक्लान्  त ? यो प्रश्नको जवाफ थाहा पाउन असोज २६ गतेसम्म कुर्नुपर्छ। वडा दसैंको छेकोमा फिल्म ‘परदेशी २’ प्रदर्शनमा आउँदैछ।

सपुतकै भनाइमा अभिनेताका रुपमा यो उनको परीक्षा हो। 'ब्राण्ड ब्यानर र सफल फिल्मको सिक्वेल भएकाले पनि मुख्य पात्रका रुपमा मप्रति दर्शकको चासो र अपेक्षा रहनु स्वभाविक हो', सपुतले भने, 'यसलाई मैले धेरै गम्भीर रुपमा लिएको छैन, बरु पहिलोपटक फिल्ममा अभिनय गर्दैछु, हिरो बन्दैछु भन्ने कुराले दंग र उत्साहित छु।'

सफलताको विरासत जोडिएको फिल्म भएकाले त्यसको ओजलाई धान्नुपर्छ भन्ने महसुस आफूलाई भइरहेको उनले सुनाए। 'मैले गायकका रुपमा जुन परिचय बनाएको छु, त्यसको सफलताको भारी कहीँ न कहीँ मेरो फिल्म अभिनयमा पनि जोडिन्छ', उनले भने, 'फिल्म चल्ने-नचल्ने विषय दर्शकको हातमा छ।'

फिल्ममा अभिनय गर्ने सपना ‘परदेशी २’ बाट पूरा हुन लागेकामा सपुतले खुसी व्यक्त गरे। 'फिल्मको कथा, पात्र र चरित्र निर्वाहका दृष्टिले फिल्मको सिक्वेल मिल्दोजुल्दो हुन सक्छ, तर व्यक्तिगत रुपमा भने मलाई नयाँ फिल्म, नयाँ कथामा अभिनय गर्दैछु भन्ने अनुभूति भइरहेको छ, ठूलो पर्दामा देखिने कुराले यसै फुरुंग छु।'

आठ वर्षअघिको फिल्म ‘परदेशी’ व्यावसायिक रुपमा सफल भएकाले पनि ‘परदेशी २’ माथि हलमा टिक्नैपर्ने दबाब छ। सपुतको अभिनय यात्रामा पनि यो फिल्म सुखद् प्रस्थान बन्न सक्छ या सक्दैन, त्यो अझै पनि समयको गर्तमा छ। म्यूजिक भिडियोको अभिनय र नृत्यमा रुचाइएका उनलाई फिल्म फाप्ने हो या होइन यसै भन्न सकिन्न।

सपुतले ‘परदेशी २’ को प्रदर्शनपछि अरु फिल्ममा आबद्ध हुने या आफैंले फिल्म बनाउने भन्नेबारे अहिले नै केही खुलाउन चाहेनन्। उनले यसअघि पनि फिल्म निर्माण र निर्देशनमा लाग्ने संकेत गरेका थिए। अहिलेलाई उनी देशविदेशका सांगीतिक यात्रालाई थाँती राखेर फिल्मको प्रचारमा खटिएका छन्। ‘परदेशी २’ को कथामा आधारित नाटक लिएर देशका विभिन्न सहरमा जान लागिएको सपुतले बताए।

'फिल्मको प्रचारात्मक कार्यक्रम लिएर मसहित फिल्मको टिम विभिन्न सहरमा पुग्दैछौं, म आफैंले पूरै समय फिल्मको प्रवर्द्धनलाई दिएको छु, दर्शकहरु भेटिरहेको छु', उनले भने, 'दर्शकको साथ र प्रतिक्रियाले हामी उत्साहित छौं, दर्शकमा पुग्नुको आनन्द अरु केहीसँग तुलना हुन सक्दैन।' फिल्मको प्रचारका क्रममा सपुतले आफ्ना लोकप्रिय गीतसमेत सुनाउने गरेका छन्।

नारायण रायमाझी निर्देशित सो फिल्ममा सपुतसँगै केकी अधिकारी, वर्षा सिवाकोटी, दिलीप रायमाझी, प्रशान्त तामाङ, नीर शाह, रमा थपलियालगायतको अभिनय छ। रायमाझी र राजेश वंशलको संयुक्त निर्माण रहेको फिल्ममा प्रवासी नेपालीको कथालाई समेटिएको जनाइएको छ।

फिल्मको ‘हिजो काम, आज काम, काम विदेशमा’ गीत बुधबार म्यूजिक नेपाल युट्युबाट सार्वजनिक गरिएको थियो। सो गीतमा पनि सपुतको अभिनय देख्न सकिन्छ। बागलुङको काठेखोला गाउँपालिका–३ धम्जामा जन्मेका सपुतका ‘गलबन्दी’, ‘बोलमाया’, ‘पिर’, ‘सकम्बरी’, ‘दमाइ महाराज’लगायत गीत चर्चित छन्।

सामाजिक मुद्दालाई सिर्जनामा मुखरित गर्न पारंगत उनी गीतमा कथानकको प्रयोग गर्न सक्ने स्रष्टाका हिसाबले पनि चिनिन्छन्। सपुतका कतिपय रचनालाई लिएर सार्वजनिक विवाद र बहससमेत हुने गरेको छ।  केही दिनअघि भारतीय योगगुरु रामदेवले सपुत नेपालका सलमान, साहरुख र आमिर खानभन्दा ठूला स्टार रहेको भन्दै प्रशंसा गरेका थिए। -रासस