नेयमार र एमबाप्पे घाइते हुँदा पिएसजीलाई संकट

एजेन्सी- फ्रेन्च क्लब पेरिस सेन्ट जर्मन (पिएसजी)लाई आफ्ना मुख्य दुई खेलाडी चोट ग्रस्त भएपछि संकट परेको छ । टोलीमा ‘गोल मेसिन’का रूपमा चिनिएका ब्राजिलियन स्टार खेलाडी नेइमार र फ्रान्सका युवा स्टार केलियन एम्बाप्पे एकसाथ घाइते हुँदा पिएसजीमाथि संकट बढेको हो ।

पिएएसजीले अर्को साता युरोपियन च्याम्पियन्स लिगमा समूहको बलियो टोली लिभरपुलसँग महत्वपुर्ण खेल खेल्दै छ । यसअघि पिएसजीले लिभरपुलसँग च्याम्पियन्स लिगमा ३-२ ले हार व्यहोरेको थियो । 

समूह ‘सी’ मा रहेको पिएसजी ४ खेलमा एक खेलमा जित, दुई बराबरी र १ खेलमा पराजय भोग्दै पाँच अंककासाथ समूहको तेस्रो स्थानमा छ । लिभरपुल भने समान ४ खेलमा २ खेलमा जित र २ खेलमा पराजित हुँदै ६ अंककासाथ दोस्रो स्थानमा छ । 

च्याम्पियन्स लिगको समूहमा हाल तेस्रो स्थानमा रहेको पिएसजीले अर्को चरणमा स्थान बनाउन दुई खेलमा जित्नुपर्ने दबाब छ । जसमा पिएसजीले पहिलो खेल लिभरपुल र अन्तिम खेलमा रेड स्टार बेलग्रेडसँग खेल्नेछ । 

यदि अर्को साता हुने लिभरपुसँगको खेलमा हार भोगे पिएसजी समूह चरणबाटै बाहिरिन सक्ने छ । तर, त्यसबेलासम्म घाइते २ जना स्टार खेलाडी मैदान फर्किए सक्ने वा नसक्ने खुलासा भएको छैन् । 

लिभरपुलसँगको खेल अघि पिएसजीले लिग वानमा टुलुजको सामना गर्दैछ । नेइमार गत राति अन्तर्राष्ट्रिय मैत्रीपूर्ण खेलमा क्यामरुनविरुद्ध खेल्ने दौरान घाइते भएका थिए । 

त्यस्तै अर्का खेलाडी एमबाप्पे पनि उरुग्वेसँगको मैत्रीपूर्ण खेल दौरान घाइते भएका छन् । उनी गोलकिपरसँगको ट्याकलका कारण घाइते भएका हुन् । दुबै खेलाडी कहिले मैदान फर्किने भन्ने अहिले सम्म कुनै जानकारी आएको छैन ।