युइएफए नेसन्स लिग : पोर्चुगल र पोल्याण्ड भिड्दै 

काठामडौं- युइएफए नेसन्स लिग फुटबल अन्तर्गत आज (मंगलबार) राति पोर्चुगल र पोल्याण्ड भिड्दै छन् । यी दुई टोली नेसन्स लिगको समूह चरणको अन्तिम खेलमा भिड्न लागेका हुन् । खेल आज राति पोर्चुगलको घरेलु मैदानमा नेपाली समय अनुसार ठीक १:३० बजेबाट सुरु हुनेछ ।

मंगलबारको खेलको नतिजाले यि दुबै टोलीलाई कुनै फरक पर्ने छैनन् । किनकी, पोर्चुगल यसअघि इटालीसँग बराबरी खेल्दै अन्तिम खेलअगावै प्रतियोगिताको अन्तिम चारमा पुगिसकेको छ भने यता पोल्याण्ड अन्तिम खेल बाँकी छँदै रेलिगेसनमा परेको छ । 

तसर्थ आजको खेल दुवै टोलीका लागि औपचारिकता मात्रै हुनेछ । तर हालसम्म प्रतियोगितामा जित विहीन रहेको पोल्याण्डका लागि यो खेल पहिलो जित निकाल्ने अवसर हनेछ । 

यसअघि पोल्याण्ड आफ्ना ३ वटै खेलमा जितविहीन छ । जहाँ पोल्याण्डले २ खेल हारेको छ भने एक खेल बराबरी खेलेको छ । यता, पोर्चुगलले भने २ खेल जितेर एक खेल बराबरी गरेको छ ।

यसअघि भएको खेलमा पोर्चुगलले पोल्याण्डलाई उसकै घरमा २-३ ले हराएको थियो । आज आफ्नो घरमा उत्रिँदा पोर्चुगल तेस्रो जितका लागि प्रयास गर्नेछ । यस समूहमा हाल पोर्चुगल ७ अंकसहित शीर्ष स्थानमा रहँदा इटाली ५ अंकसहित दोस्रो स्थानमा छ । पोल्यान्डको खातामा मात्रै १ अंक छ ।