डिपिएलको मिति घोषण, मुख्य प्रायोजकसँग हस्ताक्षर

धनगढी- तेस्रो संस्करणको रुस्लान धनगढी प्रिमियर लिग (डिपिएल) टी-२० क्रिकेटको मिति घोषणा भएको छ । तेस्रो संस्करणको डिपिएल माघ १९ देखि फागुन ४ गतेसम्म सञ्चालन गर्ने तयारी गरेको प्रतियोगिताका निर्देशक सुवास शाहीले एक कार्यक्रमको आयोजना गर्दै जानकारी दिए । 

प्रतियोगिताको मितिसँगै मुख्य प्रायोजकसँग सम्झौता पत्रमा हस्ताक्षर भएको छ । मुख्य प्रायोजनमा डिस्टिलरीको रुस्लानले निरन्तरता दिएसँगै रुस्लानको तर्फबाट चीफ फाइनान्स अफिसर सतीस कर्ण र धनगढ़ी क्रिकेट एकेडमीका अध्यक्ष सुबास शाहीले समझौता पत्रमा हस्ताक्षर गरे । यससँगै विजय डिस्टलरीले १ करोड १० लाखको मुख्य प्रायोजन गरेको जानकारी दिए ।

यसअघि देशकै सर्वाधिक ठुलो धनराशीको क्रिकेट प्रतियोगिताको रुपमा २०७३ र २०७४ सालमा डीपीएलको पहिलो र दोसा्रे संस्करण आयोजना गरिएको थियो । दुबै संस्करणको विजेता टिम चौराह धनगढी हो । यतिमा हैन देशमै पहिलोपल्ट अक्सनबाट खेलाडी लिएर टिम तयार पारिएको थियो । 

रुस्लान डीपीएल तीनमा पनि ६ वटा टोलीको नै सहभागिता रहनेछ । प्रत्येक टिममा १५-१५ खेलाडी राख्न पाउने छन् । जसमा दुई विदेशी र धनगढीमा हुने ट्यालेन्ट हन्टबाट आएका सुदूरपश्चिमका एक खेलाडी प्रत्येक टिममा अनिवार्य समावेश गर्नुपर्ने प्रावधानलाई निरन्तरता दिइएको छ ।

अनुमानित कुल लागत ५ करोड रहेको यस प्रतियोगिता धनगढीस्थित फाप्ला अन्तर्राष्ट्रिय क्रिकेट रंगशालामा हुनेछ । यस अघि प्रतियोगिता हुदैँ आएको संघीय इकाई प्रहरी कार्यालयको मैदानलाई वैकल्पिक मैदानका रुपमा तयार गरिने आयोजकले जानकारी दिए ।