राष्ट्रिय टोली छोड्दै रियल मड्रिड पुगे रामोस

एजेन्सी- स्पेन तथा रियल मड्रिडका कप्तान सर्जियो रामोस यूईएफए नेसन्स लिगमा घाइते भएपछि स्पेनिस राष्ट्रिय टोली छाडेर मड्रिड फर्केका छन् । उनी बिहीबार क्रोएसियाविरुद्ध भएको यूईएफए नेसन्स लिग खेलमा घाइते भएका थिए । 

उक्त खेल स्पेनले ३-२ ले गुमाउन पुगेको थियो । क्रोएसियासँग पराजित भएसँगै अन्तिम चारमा पर्न अर्को खेलको नतिजा कुर्नुपर्ने भएको छ । उक्त खेलमा रामोसले तिघ्राको चोट बोकेपछि विश्राम लिने निर्णय गरेका हुन् ।

स्पेनिस राष्ट्रिय टोलीले सूचना जारी गर्दै रामोस आइतबार हुने खेलका लागि उपलब्ध नहुने जनाएको छ । स्पेनले आइतबार लास पाल्मासमा बोस्निया हर्जगोभिनासँग मैत्रीपूर्ण खेल खेल्दैछ । 

अब आइतबार वेम्बलीमा हुने खेलमा इंग्ल्यान्ड र क्रोएसियाले बराबरी खेले स्पेन अगाडी बढ्नेछ । रामोस घाइते भएसँगै उनी थप परिक्षणका लागि म्याड्रिड लागेका छन् । ला लिगा अन्तर्गत नोभेम्बर २४ मा एइबारसँग हुने खेलका लागि उनको स्थिति अझै विचाराधिन छ ।

सर्जियो रेगुलिओन, नाचो फर्नान्डेज, जेसस भालेहो र क्यासेमिरो यसअघि नै मैदानबाहिर विश्राममा छन् । मार्सेलो, ड्यानी कर्भाजल र राफेल भारनपनि पूर्ण रुपमा फिट छैनन् । रामोसको अनुपस्थितिले डिफेन्समा मात्र नभएर रियलको नेतृत्वमा पनि समस्या आउनेछ ।