सेनाका तीन खेलाडी अन्तिम चारमा

काठमाडौं- नेपाली सेनाका तीन खेलाडी योनेक्स सनराईज आठौं पुष्पलाल स्मृती राष्ट्रिय खुला ब्याडमिन्टन प्रतियोगिता २०७५ को पुरुष एकल तर्फ सेमिफाईनलमा प्रवेश गरेका छन् ।

त्रिपुरेश्वरस्थित राखेप कभर्डहलमा भएको प्रतियोगितामा सेनाका रत्नजित तामाङ्ग पुलिसका निर बिक्रम देवकोटालाई २१-१७, २१-१८ ले पन्छाउँदै अन्तिम चारमा पुगेका हुन् । अव तामाङ्गले आफ्नै क्लबका रुकेश महर्जनको सामना गर्ने छन् । 

रुकेशले पुलिसका बिष्णु कटुवाललाई २१-१६, २१-१९ ले पाखा लगाए । यस्तै सेनाका अर्का खेलाडी नविन श्रेष्ठले भोजपुरका बिकास श्रेष्ठलाई २१-१९, २१-११ ले पन्छाए । श्रेष्ठले फाईनल प्रवेशका लागि एपिएफका दिपेश धामीको सामना गर्ने छन् । दिपेशले सिल्क ग्रुपका प्रिन्स दाहाललाई २१-१६, २२-२० ले पराजित गरे ।

महिला एकल तर्फ नेपाली सेनाका दुई र एपिएफका दुई खेलाडीले अन्तिम चारको यात्रा तय गरे । बिहिबार सम्पन्न क्वाटरफाईनल खेलमा सेनाका नङ्गशल देवी तामाङ्ग, एपिएफकी शोभा गौचन, सेनाकी रशिला महर्जन, एपिएफकी जेशिका गुरुङ्गले सेमिफाईनलमा स्थान बनाएका छन् ।