रोनाल्डो र मेस्सीलाई उछिन्दै ‘गोल ५०’ अवार्ड मोड्रिचलाई

एजेन्सी- चर्चित खेल सञ्चार संस्था ‘गोल’ ले प्रदान गर्दै आएको ‘गोल ५०’ अवार्ड रियल मड्रिड तथा क्रोएसियाका स्टार खेलाडी लुका मोड्रिचले जितेका छन् । मोड्रिचले विश्व फुटबलका दुई सुपरस्टार बार्सिलोनाका लियोनल मेस्सी र युभेन्टसका क्रिस्टियानो रोनाल्डोलाई पछि पार्दै ‘गोल ५०’ अवार्ड जितेका हुन् । 

सन् २०१८ का लागि क्रोएसियन कप्तान मोड्रिचले यो अवार्ड जितेका हुन् । सन् २००८ बाट प्रदान गरिदै आएको यो अवार्ड ११औं संस्करण हो । सिजन २०१७-१८ का लागि वर्षभरिको प्रदर्शनका आधारमा सो अवार्ड दिइदै आएको छ । 

यसपटक यो अवार्डका लागि रोनाल्डो, मेस्सी र मोड्रिकलाई दाबेदार मानिएको थियो । तर, टप-३ मा मोड्रिकसँगै रोनाल्डो र सालाह परे । मेस्सी यस अवार्डका लागि टप-३ मै पर्न सकेनन् । ‘गोल ५०’ अवार्डका लागि मोड्रिक विजेता बन्दा रोनाल्डो दोस्रो नम्बरमा रहे । 

तेस्रो नम्बरमा सालाह रहँदा चौथो नम्बरमा पिएसजी तथा फ्रान्सका केलियन एमबाप्पे रहेका छन् । बार्सिलोनाका कप्तान मेस्सी भने पाँचौं स्थानमा रहे । त्यस्तै, छैटौं नम्बरमा म्यानचेस्टर सिटी तथा बेल्जियमका केभिन डि ब्रुएन, सातौंमा रियल मड्रिड तथा फ्रान्सका राफाएल भाराने, आठौंमा टोटनह्याम तथा इंग्ल्यान्डका ह्यारी केन, नवौंमा एथ्लेटिको मड्रिड तथा फ्रान्सका एन्टोनी ग्रीजम्यान र दशौंमा रियल मड्रिड तथा ब्राजिलका मार्सेलो परेका छन् । 

‘गोल ५०’ को अवार्ड यसअघि सन् २०१७ मा र २०१६ मा लगातार रोनाल्डोले जितेका थिए । त्यसअघि २०१५ मा मेस्सीले जितेका थिए । हालसम्म यो अवार्ड सर्वा्धिक धेरै रोनाल्डोले ५ पटक जितेका छन् भने मेस्सीले भने ४ पटक मात्रै जितेका छन् ।