च्याम्पियन्स लिगमा बार्सिलोना दोस्रो चरणमा प्रवेश

एजेन्सी- मंगलबार राति भएको यूईएफए च्याम्पियन्स लिग अन्तर्गत बार्सिलोनाले इन्टर मिलानसँग बराबरी खेलेको छ । कप्तान लियोनल मेस्सी बिना मैदानमा उत्रेको बार्सिलोनाले मिलानसँग १-१ को बराबरी खेलेको हो । 

बराबरीमा बाबजुद बार्सिलोना दोस्रो चरणमा पुगेको छ । अर्को खेलमा टोटेनहमले पीएसभीलाई २-१ ले हराएपछि बार्सिलोना अर्को चरणमा पुगेको हो ।

यस नतिजासँगै समूहमा बार्सिलोनाले अग्रता कायमै राखेको छ । निकै प्रतिस्पर्धात्मक खेलको पहिलो हाफमा दुवै टोलीले गोल रहित बराबरी खेलेका थिइ । दुबै टोली दोस्रो हाफमा एक एक गोल गरेका थिए । 

बार्सिलोनाका लागि ब्राजिलका विङ्गर माल्कमले अग्रता दिलाए । उनले खेलको ७ मिनेट बाँकी रहँदा गोल गरेका थिए । त्यस्तै इन्टरका कप्तान माउरो इकार्डीले ३ मिनेट समय बाँकी छँदा पेनाल्टी क्षेत्रभित्र बाट गोल गर्दै खेल बराबरीमा ल्याए । 

खेलमा बार्सिलोनाले अधिकांश समय बलमा पकड बनाएपनि गोलको अवसर भने सोहिअनुसार सिर्जना गर्न सकेन । लुइस सुआरेजले पहिलो हाफमा पाएको मौका सदुपयोग गर्न नसक्दा बार्सिलोनाले दोस्रो हाफसम्म कुर्नुपरेको थियो । बार्सिलोनाले अब लिगको खेलमा पीएसभी र टोटेनहमको सामना गर्नेछ ।