पीपीएल : उपाधिका लागि चितवन पोखराविरुद्ध ब्याटिङ गर्दै

पोखरा- पोखरा प्रिमियर लिग (पीपीएल) को उपाधिको लागि आज (मंगलबार) कप्तान पारस खड्को चितवन राइनोज शरद भेषवाकरको पोखरा पल्टनविरुद्ध ब्याटिङ गर्दै छ । चितवनले पोखराविरुद्ध टस हारेर पहिले ब्याटिङ गर्ने निम्तो पाएको हो ।
 
पोखरा रंगशालामा सुरु भएको खेलमा पोखरा लिग तालिकाको शीर्ष स्थानमा रहँदै सोझै फाइनलमा प्रवेश गरेको थियो भने चितवनले अन्तिम तीन खेलमा लगातार जित निकाल्दै प्ले अफमा ज्ञानेन्द्र मल्लको काठमाडौँ रोयल्सलाई ६ विकेटले पराजित गर्दै फाइनलमा स्थान बनाएको थियो । 

समुह चरणको खेलमा पोखराले चितवनलाई ५ विकेटले पराजित गरेको थियो । आज फाईनलमा उक्त बदला लिने दाउमा रहेको चितवन यससँगै उपाधि उचाल्ने दाउमा रहेको छ । 

विजेता टोली २७ लाख र उपविजेता टोलीले १० लाख रुपैयाँ प्राप्त गर्नेछन् । पूर्वघोषित पुरस्कार अनुसार प्रतियोगिताको म्यान अफ द सिरिज, उत्कृष्ट ब्याट्सम्यान र बलरले सुजुकी जिक्सर १ सय ५५ सीसी मोटरसाइकल पाउने छन् । 

मोस्ट भ्यालुएबल प्लेयरलाई १ लाख र उदयीमान खेलाडीलाई ५० हजार रुपैयाँको व्यवस्था गरिएको छ ।