कोरा भक्तपुर साइकलिङ च्यालेन्ज सुरु

भक्तपुर– भक्तपुरलाई राष्ट्रिय तथा अन्तर्राष्ट्रिय साइकलिङ गन्तव्य बनाउने उद्देश्यले १ सय किलोमिटर लामो ‘तेस्रो कोरा भक्तपुर साइकलिङ च्यालेन्ज–२०२३’ सुरु भएको छ । 
भक्तपुरको ऐतिहासिक एवं सम्पदास्थल दरबारस्क्वायरमा ‘साइकल कनेक्ट संस्था’ले आयोजना गरेको च्यालेन्जको बागमती प्रदेशसभा सदस्य सुरेन्द्रराज गोसाईंले सुरु गरे।
तीन वर्षदेखि सञ्चालन हुँदै आएको ‘कोरा भक्तपुर साइकलिङ च्यालेन्ज’ले नेपाललाई विश्वमा चिनाउन मद्दत गर्नुका साथै पर्यटकीय विकासमा ठूलो टेवा पु¥याउँदै आएको गोसाईंले बताए। 
च्यालेन्जले साइकल यात्रीलाई प्रोत्साहन दिनुका साथै यहाँको प्राकृतिक सौन्दर्यलाई नियाल्दै ग्रामीण पर्यटकीय प्रवद्र्धनमा सहयोग पुग्ने विश्वास लिएको उनको भनाइ छ।
संस्थाका संस्थापक अध्यक्ष एवं कार्यक्रमका संयोजक सुमित बालाले यस वर्ष कार्यक्रममा छ सयभन्दा बढी साइकल यात्रीको सहभागिता रहेको बताए। 
उनले भक्तपुरलाई साइकलिङ गन्तव्य बनाउनुका साथै टर्की र सिरियाका भूकम्प पीडितलाई सहयोग गर्ने लक्ष्यका साथ कार्यक्रम आयोजना गरिएको जानकारी दिए।
भक्तपुर तथा काभ्रेका अधिकांश पर्यटकीय क्षेत्रको सौन्दर्यलाई नियाल्दै २ हजार १ सय मिटर उचाइसम्म १ सय किलोमिटरको यात्रा आज एकै दिनमा सकिने बालाले बताए।
उनका अनुसार बिहान ६ बजे भक्तपुरको दरबार स्क्वायरबाट सुरु भएको साइकल यात्रा सिद्धपोखरी, सल्लाघारी, नयाँ ठिमी, बहाखा बजार, बोडे, नीलबाराही, बेँसीगाउँ, दुवाकोट हुँदै चाँगुनारायणसम्म पुगेको छ। 
यो यात्रा त्रिशूल डाँडा, तेलकोट, नगरकोट, थाकलमाथ, खावा, नाला गुम्बा, भंगाल, लटरम्बेश्वर, साँगा, खाल्चोक, आशापुरी, रानीकोट, गुण्डु, गाम्चा, बिरुवा, सिरुटार, बालकोट, लोकन्थली, कौशलटार, सानोथिमि, सल्लाघारी हुँदै पुनः भक्तपुर दरबार क्षेत्रमा पुगेर साँझ ७ बजे समापन गरिने संयोजक बालाले जानकारी दिए। उनले समापनका क्रममा मनोरञ्जनात्मक कार्यक्रम समेतको आयोजना गरिने बताए। 
कोरा मास्टर सुनिल ख्याजुले साइकलबाट ५०, ७५ र १ सय किलोमिटरका तीनवटा रूटमा यात्रा हुने जानकारी दिए। उनका अनसार च्यालेन्जमा महिला ५० जनासहित करिब ६ सय बढीको सहभागिता रहेको छ। 
साइकल कनेक्टका अध्यक्ष निर्जला कोजूले च्यालेन्जमा भक्तपुर, काठमाडौँ, ललितपुर, बनेपा, पनौती, पोखरा, तनहुँ, धरान, भैरहवा, सुर्खेत, नेपालगञ्ज, वीरगञ्ज, चितवन, नवलरासी, बुटवललगायत सहरबाट साइकल यात्रामा सहभागी हुन आएको बताए। 
उनका अनुसार यात्रामा अमेरिका र युरोपियन राष्ट्रका विदेशी साइकल यात्री समेत सहभागी छन् । बेलुकीको समापन कार्यक्रममा तीन वटै रुटअन्तर्गतको च्यालेन्ज पूरा गर्ने सहभागीलाई मेडल वितरण गरिने उनले जानकारी दिए।–रासस