फाइनल प्रवेशका लागि काठमाडौं टस जितेर ब्याटिङ गर्दै

पोखरा- पोखरामा जारी सर्वाधिक पुरस्कार राशीको पोखरा प्रिमियर लिग (पीपीएल) टी-२० क्रिकेटको फाइनल प्रवेशको लागि प्ले अफमा काठमाडौं रोयल्सले चिनवन राइनोजविरुद्ध ब्याटिङ गर्दै छ । 

पोखरा रंगशालामा ज्ञानेन्द्र मल्लको काठमाडाले पारस खड्काको चितवनविरुद्ध टस जितेर पहिहलो ब्याटिङ गर्ने निर्णय गरेको हो । यस खेलको विजेता टोलीले शरद भेषवारको आयोजक टोली पोखरा पल्टसँग फाइनल खेल खेल्ने छ । 

लिगमा चितवन लिगको दोस्रो र काठमाडौं तेस्रो हुँदै प्ले अफमा छनोट भएका थिए । लिगको पहिलो चरणको पाँच खेलमा ३ जित र २ हारसहित चितवन र काठमाडौंले समान ६-६ अंक जोडेका थिए । 

तर, नेट रन रेटको आधारमा चितवन दोस्रो र काठमाडौं तेस्रो स्थानमा रहेको थिए ।  चितवन र काठमाडौंबीचको प्ले अफ खेल निकै रोमान्चक हुने अनुमान गरिएको छ । किनकी दुवै टोली उच्च लयमा देखिएका छन् । 

सुरुवातमा जम्न नसकेको चितवन पछिल्लो समय लयमा रहेको छ । सुरुवाती २ खेल गुमाएको चितवनले त्यसपछि लगातार ३ खेलमा जित निकाल्यो । लिग चरणमा काठमाडौंलाई पराजित गरेको चितवन थप उच्च मनोबलसहित मैदान उत्रनेछन् । 

यता, काठमाडौंले भने लिग चरणको हारको बदला लिंदै फाइनल पुग्ने लक्ष्यमा हुनेछ । विजेताले मंगलबार हुने फाइनलमा घरेलु टोली पोखरा पल्टनसंग खेल्नेछ ।