ला लिगामा रियलको पुनरागमन 

मड्रिड (एजेन्सी)- शनिबर राति भएको स्पेनिस ला लिगा फुटबलमा रियल मड्रिडले जित निकालेको छ । लिग खेलमा रियलले रियल भालाडोलिडलाई २-० गोल अन्तरले पराजित गर्दै जित निकालेको हो । 

पछिल्ला ६ खेलमा जराजय भोग्दै आएको रियलको यो पहिलो जित हो । जुलेन लुपेटेगुई को स्थानमा आएका प्रशिक्षक सान्टियागो सोलारीको ला लिगामा यो पहिलो जित समेत हो । नयाँ प्रशिक्षकको नेतृत्वमा पहिलो पटक लिगमा उत्रिएको रियलमा पुरानै समस्या प्रष्ट देखिएको थियो । 

उसले गोलका लागि खेलको अन्तिम समयसम्मै पर्खनु पर्यो । दोस्रो हाफमा भालाडोलिडका दुई प्रहार पोस्टमा लागेर फर्किएका थिए ।

८३ औ मिनेटमा ब्राजिलियन युवा खेलाडी भिनिसियस जुनियरको प्रहार भालाडोलिडका डिफेन्डर किको ओलिभसलाई लागेर पोस्टमा छिरेको थियो । सोही आत्मघाति गोलबाट रियलले खेलमा अग्रता लिएका थियो । 

खेल सकिन दुई मिनेट बाँकी छदाँ रियलले पेनाल्टीको अवसर पायो । करिम बेन्जिमालाई डि बक्सभित्र लडाँएपछि प्राप्त पेनाल्टीमा कप्तान सर्जियो रामोसले गोल गरेका थिए ।

जितपछि रियल ११ खेलबाट १७ अंक जोड्दै तालिकाको छैटौ स्थानमा उक्लिएको छ । भालाडोलिड १६ अंक सहित आठौ स्थानमा छ ।