पेरिस मास्टर्स टेनिसको सेमिफाइनलमा जोकोभिच र फेडरर भिड्दै

एजेन्सी- पेरिस मास्टर्स टेनिसको सेमिफाइनलमा चर्चित प्रतिद्वन्द्वी नोभाक जोकोभिच र रोजर फेडरर भिड्ने भएका छन् । शुक्रबार राति भएको खेलमा जोकोभिचले क्रोयसियाका मरिन सिलिचलाई हराउँदै सेमिफाइनलमा पुगेका थिए भने फेडररले की निसिकोरीलाई पराजित गरेका थिए । 

पेरिसमा भएको खेलमा दोस्रो वरीयताका जोकोभिचले सिलि विरुद्ध एक सेटले पछि परेको अवस्थामा कमब्याक गरे । दुई घण्टा १२ मिनेट कोर्टमा बिताएका जोकोभिचले पहिलो सेट ४-६ ले गुमाएका थिए । 

तर त्यसपछि उत्कृष्ट कमब्याक गरेको जोकोभिचले दोस्रो सेट ६-२ ले जिते भने तेस्रो सेट ६-३ ले आफ्नो पक्षमा पारे । तेस्रो सेटमा पनि दुई-एकले पछि परेको अवस्थामा खेलमा फकिएका थिए ।

यस्तै अर्को खेलमा स्विस खेलाडी फेडररले जापानी खेलाडी की निसिकोरीविरुद्ध २-० को सहज जित निकाले । अष्ट्रेलियन च्याम्पियन फेडररले १० औँ वरीयताका निसिकोरीविरुद्ध पहिलो सेट ६-४ ले जितेका थिए भने दोस्रो सेटमा पनि ६-४ ले नै विजयी भएका थिए । 

अघिल्लो साता स्विस इन्डोरको उपाधि जित्दै उपाधि संख्या ९९ औँ पुर्याएका फेडररले यो प्रतियोगिता जितेमा उपाधिमा शतक बनाउनेछन ।