साढे दुुई केजी सुन खोज्न दुई सुन पसल शिलबन्दी

रुपन्देही– रुपन्देहीको कालीदह नाका हुँदै भारत लैजाँदै गर्दा बरामद साढे दुई केजी सुनको अनुसन्धानका क्रममा बुटवलका सुन व्यवसायीको संलग्नता भेटिएको छ।

नाका हुँदै १० असारमा भारततर्फ लैजाँदै गर्दा सशस्त्र प्रहरीले इँटाजस्तै रङ र आकारको झन्डै साढे दुई किलोको शंकास्पद वस्तु बरामद गरेको थियो। अनुसन्धान गर्दा इँटाजस्तो उक्त वस्तु एक केजी ९६५.३ ग्राम तौलको सुन प्रमाणित भएको थियो।

रुपन्देहीको लुम्बिनी सांस्कृतिक नगरपालिका–१३ कालीदह नाका हुँदै १० असारमा भारततर्फ सीमा पार गर्न लागेको बा१२च३८२० नम्बरको मारुती सुजुकी कार सशस्त्र प्रहरीको सीमा सुरक्षा गुल्म डन्डाको टोलीले चेकजाँच गर्दा इँटा आकारका दुई थान सुन शंकास्पद वस्तु बरामद गरेको थियो।

बरामद सुन र कार भैरहवा भन्सार कार्यालयमा बुझाई थप अनुसन्धान उक्त वस्तु एक केजी ९६५.३ ग्राम तौलको सुन प्रमाणित भएको थियो। उक्त सुन प्रकरणमा बुटवल अमरपथस्थित बालाजी सुनचाँदी पसल र लक्ष्मीपति सुनचाँदी पसलका सञ्चालकको संलग्नता देखिएपछि पसल सिल गरेर अनुसन्धान अगाडि बढाइएको छ।

सुन बरामद गर्दा पक्राउ परेका व्यक्तिका बयानका आधारमा बुटवलको अमरपथमा रहेको बालाजी र लक्ष्मीपति सुनचाँदी पसलको पनि संलग्नता रहेको प्रारम्भिक अनुसन्धानबाट खुलेकाले दुवै पसलमा सिल गरी थप अनुुसन्धान अघि बढाइएको भैरहवा भन्सार कार्यालयका प्रवक्ता युवराज भट्टराईले बताए।

‘सुन बरामदपछि संलग्नताका विषयमा अनुसन्धान जारी छ, यसबारे सबै कुरा अहिलै भन्न सकिँदैन। पसललाई शिल गरी अनुसन्धान भइरहेको छ। पछि यसबारे जानकारी आउँछ’, उनले भने।

कालीदह नाकामा सुनसहित पक्राउ परेका दाङ घोराही उपमहानगर–१० का हुमानन्द गिरीलाई अहिले जिल्ला अदालतबाट म्याद थप गरी अनुसन्धान सुरु गरिएको र उनको बयानका आधारमा अनुसन्धान गर्दा बालाजी सुनचाँदी पसलको पनि संलग्नता देखिएपछि शिल गरिएको हो।

करिब २ करोड मूल्यको सुन बरामद प्रकरणमा जिल्ला अदालतमा मुद्दा चलाउनुपर्ने कानुनी व्यवस्थाअनुसार अदालतबाट म्याद लिएर अनुसन्धान सुरु गरिएको हो।