झापामा हात्तीको आक्रमणबाट मृत्यु हुनेको संख्या बढ्दै

झापा- पछिल्लो पाँच वर्षयता झापामा हात्तीको आक्रणमबाट मृत्यु हुनेको संख्या बढ्दै गएको छ। चालु आर्थिक वर्ष २०७९/८० मा हालसम्म एक गैर नेपालीसहित सात जनाको हात्तीको आक्रमणबाट मृत्यु भइसकेको डिभिजन वन कार्यालय झापाका प्रमुख मेघराज राईल जानकारी दिए।

हात्तीको आक्रमणबाट गत आव २०७८/७९ मा पाँच जना, आव २०७७/७८ मा तीन, २०७६/७७ मा दुई, आव २०७५/७६ मा एक जना र आव २०७४/७५ मा पाँच जनाको मृत्यु भएको छ।

झापामा पछिल्लो १२ वर्षयता हात्तीको आक्रणममा परी ६१ जनाको मृत्यु भइसकेको छ जसमा सात जना गैर नेपाली रहेका छन। त्यस्तै, सोही अवधिमा १६ वटा हात्तीको समेत मृत्यु भएको कार्यालयको तथ्यांकमा उल्लेख छ। चालु आवमा जिल्लामा दुई वटा हात्तीको मृत्यु भइसकेको छ।

मृत्यु हुनेमा अधिकांश आफ्नै घर-खेतमा हात्तीले आक्रमणमा परेका हुन। बाह्रदशी गाउँपालिका-२ का देवीबहादुर अधिकारी आफ्नै जग्गामा घाँस काटिरहेको अवस्थामा हात्तीको आक्रमणको शिकार बने।

त्यस्तै, बाह्रदशी-१ का जगतबहादुर भुजेल सामुदायिक वनभित्र घाँस काट्द जाँदै गर्दा हात्तीको आक्रमणमा परे। शिवसताक्षी नगरपालिका-११ की कृष्णमाया भण्डारीलाई घरमै सुतिरहेको अवस्थामा हात्तीले मारेको डिभिजन वन कार्यालयको रेकर्डमा उल्लेख छ।

यस्तै, बुद्धशान्ति गाउँपालिका-४ का भीमबहादुर भट्टराईको मकैबारीमा हात्तीले आक्रमण गरेको थियो। बुद्धशान्ति-५ की सम्झना श्रेष्ठ स्कुटरमा घर जाँदै गर्दा बाटोमै हात्तीले आक्रमण गर्दा मृत्यु भएको थियो।

भद्रपुर नगरपालिका-७ का गिरेन कर्मकारलाई हल्दीबारी गाउँपालिका-२ चिया बगान नजिकै च्याउ टिप्न जाँदा हात्तीको आक्रमणमा परेका थिए। दमक-३ का कमैया राई (गैरनेपाली)लाई हम्सेदुम्से सामुदायिक वनमा हात्तीले आक्रमण गरेको थियो भने उनको उपचारको क्रममा लाइफलाइन अस्पताल दमकमा मृत्यु भएको थियो।

झापामा चालु आर्थिक वर्षमा दुई सय १३ जना हात्ती पीडितले राहत पाएका छन। हात्तीको आक्रमणबाट घाइते, मृत्यु भएका, सम्पत्ति, चौपाया र अन्नबालीमा क्षति पुर्‍याएबापत उनीहरूले ७१ लाख ६६ हजार सात सय राहत पाएको डिभिजन वन कार्यालय झापाकी सूचना अधिकारी अञ्जना पुरीले जानकारी दिइन्।

चालु आवमा घाइतेको उपचारका लागि चार लाख, मृत्यु राहत ५० लाख, सम्पत्ति, चौपाया र अन्नबालीमा क्षति पुर्‍याएबापत १७ लाख ६६ हजार सात सय राहत रकम उपलब्ध गराइएको उनले बताइन्।

गत असार १२ गते हात्तीको आक्रमणबाट मृत्यु भएका भद्रपुर-७ का गिरेन कर्मकारको राहत रकम प्रक्रियामा रहेको छ। सरकारले गैरनेपालीको हकमा भने राहत उपलब्ध नगराउने उनको भनाइ छ।