बूढीगण्डकी आयोजना यसै महिनाभित्र शिलान्यास : प्रधानमन्त्री प्रचण्ड

काठमाडौं– प्रधानमन्त्री पुष्पकमल दाहाल प्रचण्डले बूढीगण्डकी जलविद्युत् आयोजना असारभित्रै शिलान्यास हुने बताएका छन्।

प्रतिनिधिसभा बैठकमा सांसदले सोधेको प्रश्नमा प्रधानमन्त्री प्रचण्डले आयोजनाको यसै महिनाभित्र कार्यालय स्थापना र शिलान्यास हुने जानकारी दिएका हुन्।

‘यसै महिनाभित्र बूढीगण्डकी परियोजनालाई अगाडि बढाउन कार्यालय उद्घाटन र शिलान्यास प्रक्रिया सुरु गर्न सम्बन्धित अधिकारीलाई निर्देशन दिएको छु। यसै महिनाभित्र बूढीगण्डकी परियोजना अगाडि बढाउन नयाँ कार्यालय उद्घाटन हुन्छ,’ उनले भने।

१ हजार २ सय मेगावाट क्षमताको बूढीगण्डकी जलाशययुक्त आयोजना हो। निजगढ अन्तर्राष्ट्रिय विमानस्थल निर्माण फास्ट ट्रयाकसँग जोडिएकोले आयोजना यथाशीघ्र अघि बढाउन सरकार तत्पर रहेको उनको भनाइ छ।