बाढी पसेपछि बगर बन्यो खानेपानी आयोजना 

भोजपुर– सभाखोला–लोहाकोट–बिजुवापानी सामुदायिक लिफ्ट आयोजना बाढीले बगाउँदा ३ करोड बराबरको क्षति भएको छ। 

खोलाभन्दा करिब सय मिटर वर रहेको आयोजना स्थलमा बाढी पसेर सम्फवेल, पानी तान्ने मोटर पम्प, ट्रान्सफर्मर, तीन वटा कन्ट्रोल प्यानल, स्टेपलाइजर, चेन पुल्ली, पालेघरलगायत बगाउँदा तीन करोड बराबरको क्षति भएको खानेपानी तथा सरसफाइ डिभिजन कार्यालय भोजपुरका प्रमुख देवनाथ सिंहले बताए।

आयोजना निर्माणस्थल अहिले बगरमा परिणत भएको उनको भनाइ छ। ‘बाढीले आयोजना स्थल बगाउँदा तीन करोड बराबरको क्षति पुगेको छ’, उनले भने, ‘आयोजना रहेको ठाउँमा अहिले खोला बगेको अवस्था छ। आयोजना बगाउँदा स्थानीय पिउनेपानीबाट वञ्चित भएको अवस्था छ। यसलाई पुनः सञ्चालनमा ल्याउन कार्यालयले पहल थालेको छ।’

निर्माणको अन्तिम चरणमा रहेको आयोजना बाढीले बगाउँदा राज्यलाई ठूलो क्षति पुगेको उनको भनाइ छ। आयोजना कार्यालयले स्थलगत अनुगमन गरेर उपयुक्त विकल्पको खोजी गर्ने काम भइरहेको प्रमुख सिंहले बताए।

‘स्थलगत रुपमा हेर्दा आयोजनाको बेहाल अवस्था छ’, उनले भने, ‘अर्को आर्थिक वर्षको सुरुमा हस्तान्तरण गर्ने लक्ष्य थियो। हस्तान्तरणको अन्तिम अवस्थामा बाढीले क्षति पुगेको छ। पुनःसञ्चालनका लागि मन्त्रालयलाई आवश्यक जानकारी गराएको छु।’

आर्थिक वर्ष २०७५/७६ बाट यो योजना निर्माण थालिएको हो। कुल अनुमानित ११ करोड ११ लाख ८ हजार ९२७ लागतमा निर्माण भइरहेको छ। २ असार राती आएको बाढीले आयोजना बगाएपछि स्थानीय पिउनेपानीबाट वञ्चित भएका छन्। ३८६ घरपरिवारलाई पानी खुवाउने लक्ष्यका साथ निर्माण भइरहेको आयोजनाबाट १५० घरपरिवारले पानी खाँदै आएका थिए ।  

२ सय घरपरिवारमा धारा जडान गरेर पानी वितरणको अन्तिम तयारीमा रहेको अवस्थामा बढीले आयोजना बगाएको निर्माण उपभोक्ता समितिका अध्यक्ष उद्धवराज त्रितालले जानकारी दिए। निर्माणको अन्तिम चरणमा रहेको आयोजना बाढीले बगाएपछि स्थानीयलाई पानीको समस्या थपिएको उनको भनाइ छ।

‘बाढीले आयोजना बगाएपछि समस्या परेका छौं’, उनले भने, ‘बस्तीमा पानीको हाहाकार भएको छ। आयोजनास्थल बगर बनेको छ। राज्यले यसलाई चाँडो निर्माणमा ध्यान दिन आवश्यक छ।’–रासस