कोपा डेल रे : रियलको फराकिलो जित 

मड्रिड (एजेन्सी)- स्पेनको दोस्रो प्रतियोगिता कोपा डेल रे फुटबलमा रियल मड्रिडले फराकिलो जित हात पारेको छ । लगातार हार बेहोर्दै आएको रियलले बुधबार राति भएको कोपा डेल रे को पहिलो लेगमो मेलिल्लालाई ४-० ले पराजित गर्दै पुनरागमन गरेको छ । 

खराब प्रदर्शन जारी रहेपछि मंगलबार प्रशिक्षक जुलेन लसपेटेगुईको स्थानमा आएका कार्यवाहक प्रशिक्षक स्यान्टियागो सोलारीको नेतृत्वमा रहेको रियलले उसैको मैदानमा मेलिल्लालाई उत्कृष्ट पुनरागमन गरेको हो । प्रशिक्षण जुलेन लुपेटेगुईलाई बर्खास्त गरेपछि रियलले पहिलो खेलमै जित निकालेको छ ।

रियललाई जित दिलाउन करिम बेन्जिमा, मार्को एसेन्सियो, अल्भोरो ओड्रिओजोला र क्रिस्टो गोन्जालेजले एक एक गोल गरे । खेलको २८ औं मिनेटमा बेन्जिमाले गोल गर्दै रियललाई सुरुवाती अग्रता दिलाए । 

खेलको ४५ औं मिनेटमा एसेन्सियोले गोल गरेपछि पहिलो हाफमा रियल २-० ले अघि रह्यो । दोस्रो हाफमा रियलले थप दुई गोल गर्यो । खेलको ७९ औं मिनेटमा ओड्रिओजोलाले गोल गर्दै रियलको अग्रता ३-० को बनाए । 

त्यसपछि खेलको ९० औं मिनेटमा गोन्जालेजले गोल गर्दै रियललाई ४-० को जित दिलाए । यो जितसंँगै रियलले कोपा डेल रेको अन्तिम १६ मा पुग्ने सम्भावना बलियो बनाएको छ । अब रियलले दोस्रो लेग घरेलु मैदानमा खेल्नेछ ।