जिप दुर्घटनामा प्रदेश मन्त्रीकी पत्नी र भाउजूको मृत्यु, मन्त्रीको अवस्था गम्भीर

काठमाडौं- जिप दुर्घटनामा सुदूरपश्चिम सरकारका आन्तरिक मामिलामन्त्री पृथ्वीबहादुर सिंहकी पत्नी र भाउजूको मृत्यु भएको छ। दुर्घटनामा गम्भीर घाइते मन्त्री सिंहसहित तीन जनालाई भने थप उपचारका लागि हेलिकप्टरबाट नेपालगन्ज ल्याइएको छ।

मृत्यु हुनेमा मन्त्री पत्नी अमृता सिंह र उनकी भाउजू जयादेवी सिंह रहेको प्रहरीले जानकारी दिएको छ। घाइतेमा मन्त्री सिंह, उनका पीएसओ सहायक प्रहरी हवल्दार दीपक भण्डारी र गाडी चालक घर्मराज जोशी छन्।

सुदूरपश्चिम सरकारका मन्त्री सिंह चढेको गाडी सुपप्र ०१००१ झ ४८० नम्बरको गाडी डडेलधुराबाट चैनपुर आउने क्रममा मंगलबार दिउँसो दुई बजेतिर केदारस्युँ गाउँपालिकाको धारछडा भन्ने ठाउँमा सडकबाट अन्दाजी ५० मिटर तल कालंगा खोला किनारमा खसेको थियो ।