अब रियलले उत्कृष्ट प्रदर्शन गर्ने छ : सोलारी

मड्रिड (एजेन्सी)- आइतबार बार्सिलोनासँगको खेल फराकिलो अन्तरमा गुमाए पछि प्रशिक्षक जुलेन लुपेटेगुईलाई बर्खास्त गर्दै रियल मड्रिडका कार्यवाहाक प्रशिक्षक बनेका सान्टिएगो सोलारीले अब रियलले आफ्नो पहिलो खेलमा उत्कृष्ट प्रदर्शन गर्ने दावी गरेका छन् ।

‘खेलाडीहरु बिग्रिएका छन् र खेलाडीलाई पहिलेकै स्थानमा फर्काउन चाहान्छु ।’ सोलारीले एक पत्रकार सम्मेलनमा भने, ‘यो च्याम्पियनहरुको टोली हो । यी योद्धाहरु हुन् । खेलाडीहरुले रियलको लागि धेरै चिज दिए । सुधार हुनमा केहि समय लाग्नेछ । तर तपाईले यी खेलाडीहरूको वास्तविक खेल देख्नु हुने छ ।’ 

सोलारीलाई रियलमा मात्र चार साताको लागि कार्यवाहाक प्रशिक्षकको रुपमा नियुक्त गरेको हो । रियलको प्रशिक्षक हुनुमा उनले गर्व भएको समेत बताए । यसअघी रियल मड्रिड ‘बि’ टिमको प्रशिक्षक बनेका अर्जेन्टिनी सोलारीले बुधवार (आज) मेलिला विरुद्धको खेलमा रियलले आफ्नो वास्तविक खेल प्रदर्शन गर्ने बताएका हुन् । रियलले कोपा डेल रे अन्तरगत बुधवार मेलिलासँग खेल्दै छ । 

‘रियलमा प्रशिक्षक हुन पाउनु मेरो लागि ठुलो अवसर हो । यो आफैमा राम्रो क्लव हो । म यतिमात्र भन्न चाहान्छु कि म रियलको प्रशिक्षक हु’ सोलिरले थपे ।

पोर्चुगिज स्टार क्रिष्टियानो रोनाल्डो र प्रशिक्षक जिनेदिन जिदानले क्लब छाडेपछि रियलले स्पेनिस ला लिगाको दश खेलमा चारमा मात्र जित निकालेको छ । दुईमा बराबरी र चारमा हार व्यहोरेको रियल १४ अंकमा नवौं स्थानमा छ ।