पीपीएल टी-२० : जित बिहिन चितवन टस हारेर ब्याटिङ गर्दै

पोखरा- पोखरामा जारी सवार्धिक पुरस्कार राशीको पोखरा प्रिमियर लिग (पीपीएल) टी-२० क्रिकेट अन्तर्गत जित बिहिन रहेको चितवन राइनोजले यतीखेर धनगढी ब्लुजविरुद्ध ब्याटिङ गदै छ । पोखरा रंगशालामा पारस खड्काको चितवनले दिपेन्द्र सिंह ऐरीको धनगढीविरुद्ध टस हारेर ब्याटिङ गर्दै छ । 
 
चितवन पहिलो जितको खोजीमा छ भने धनगढी दोस्रो जितको खोजीमा छ । अघिल्ला दुई खेलमा पराजित भएको चितवनलाई प्ले अफमा पुग्न जित्न्नै पर्ने दबाब छ । चितवन पहिलो खेलमा बुटवल ब्लास्टर्ससँग ७० रनले पराजित भएको थियो । 

यस्तै दोस्रो खेलमा पोखरा पल्टनसँग ५ विकेटले पराजित भयो । अघिल्ला दुई खेल गुमाएको कारण धनगढीविरुद्ध चितवन दबाबमा हुनेछ । धनगढीविरुद्ध पराजित भएमा चितवनको प्ले अफ यात्रा लगभग सकिनेछ । चितवनले दुई खेल खेल्दा अंकबिहिन रहेर लिगको अन्तिममा छ । 

यता, एक खेलमा जित र  एक खेल हारेको धनगढीलाई पनि जित आवश्यक छ । चितवनविरुद्धको जितले धनगढीलाई प्ले अफ यात्रा सहज हुनेछ । २ खेलबाट २ अंक जोडेको धनगढी चौथो स्थानमा छ । 

पहिलो खेलमा काठमाडौं रोयल्ससँग १७ रनले पराजित धनगढीले दोस्रो खेलमा विराटनगर टाईटन्सलाई ७८ रनले हराएको थियो ।