भारतीय व्यवसायीलाई सूचना प्रविधि क्षेत्रमा लगानी गर्न प्रधानमन्त्रीको प्रचण्डको आग्रह

काठमाडौं– प्रधानमन्त्री पुष्पकमल दाहाल प्रचण्डले नेपालको सूचना प्रविधि क्षेत्रमा लगानी गर्न भारतीय व्यवसायीलाई आग्रह गरेका छन्।

भारत मध्यप्रदेशको इन्दौरमा अवस्थित विशेष आर्थिक क्षेत्रमा टाटा कन्सल्टेन्सी सर्भिसेसको अवलोकन गर्दै प्रधानमन्त्री प्रचण्डले टाटा कम्पनीजस्तै सूचना प्रविधि क्षेत्रमा लगानी गर्न आह्वान गरेका हुन्।

उनले भने, ‘टाटा कम्पनीजस्तै नेपालमा सूचना प्रविधि क्षेत्रमा धेरै सम्भावना रहेकाले यस क्षेत्रमा काम गर्न सकिन्छ। लगानी गर्नुस् त्यसका लागि हामी (नेपाल सरकार) सहजीकरण गर्छौं।’ प्रधानमन्त्री प्रचण्डले अवलोकनका क्रममा सो क्षेत्रमा सुनाखरीको बिरुवासमेत रोपेका छन्। 

सोही क्रममा अर्थमन्त्री डा. प्रकाशशरण महतले नेपालको सूचना प्रविधि क्षेत्रमा पर्याप्त जनशक्ति रहेकाले लगानीका लागि आग्रह गरे। ‘नेपालको ‘आइटी सेक्टर’मा पर्याप्त जनशक्ति छन्। लगानी गर्न आउनुस्, हामी स्वागतका लागि आतुर छौँ’, उनले भने।

भारतको प्रसिद्ध टाटा कम्पनीले संसारका ४८ बढी मुलुकमा काम गर्दै आएको छ। उक्त कम्पनीमा ६ लाख बढी कर्मचारी आबद्ध छन्।

इन्डौरको विशेष आर्थिक क्षेत्रमा रहेको टाटा कम्पनीको अवलोकनका लागि प्रधानमन्त्री, मन्त्रीहरुसहित नेपाली प्रतिनिधिमण्डल त्यस क्षेत्रमा गएको हो।
बुधबार भारत भ्रमणमा गएका प्रधानमन्त्री प्रचण्ड आज साँझ काठमाडौं फर्कने कार्यसूची छ।