एभिएम टेबलटेनिस क्लबलाई स्वीट्जरल्यान्डको सहयोग

काठमाडौं- आदर्श विद्या मन्दिर (एभिएम)मा रहेको टेबलटेनिस क्लबलाई स्वीट्जरल्यान्ड राष्ट्रिय टेबलटेनिस टिमका पूर्वप्रशिक्षक पाभेल रेहोरेकले शनिबार खेल सामग्री प्रदान गरेका छन् । पाभेलले ३ हजार डलर बराबरको खेल सामग्री प्रदान गरेका हुन् । 

उनले ललितपुरको मानभवनमा रहेको एभिएम क्लबलाई एक साता प्रशिक्षण समेत दिएको राष्ट्रिय टेबलटेनिस खेलाडी तथा एभिएम टेबलटेनिस क्लबका प्रशिक्षक पुरुषोत्तम बज्राचार्यले जानकारी दिए । 

खेल सामाग्रीमा ६ वटा बोर्ड, रोबोर्ट, बल र जर्शीलगायतका सामाग्री प्रदान गरेको राष्ट्रिय खेलाडी पुरुषोत्तमले जानकारी दिए । सोही अवसरमा राष्ट्रिय खेलकुद परिषद् (राखेप)का सदस्य सुदिल साही, स्वीस प्रशिक्षक पाभेल र एभिएमकी प्रिन्सिपल सुजिता मानन्धरले नवनिर्मित टेबलटेनिस हलको उद्घाटन गरे । 

कार्यक्रममा गत ८ देखि २७ अक्टोबरसम्म भएको टेबलटेनिस प्रशिक्षण क्याम्पमा सहभागी प्रशिक्षार्थीलाई प्रमाणपत्र प्रदानसमेत गरिएको थियो । कुल ६० खेलाडीको सहभागीता रहेको क्याम्पमा स्वीस प्रशिक्षक पाभेलले प्रशिक्षण दिएका थिए । 

कार्यक्रममा राष्ट्रिय महिला बास्केटबल टिमकी कप्तान सदिना श्रेष्ठलगायतको उपस्थिती रहेको थियो ।