पाँच पटक म्याद थप्दा पनि कालोपत्रे भएन लोकमार्ग 

बाग्लुङ- साँढे दुई दशक अगाडि ट्रयाक खुलेको राष्ट्रिय गौरवको आयोजना मध्यपहाडी लोकमार्गअन्तर्गत बाग्लुङको अक्षते-घोडाबाँधे खण्ड अहिलेसम्म कालोपत्रे हुनसकेको छैन।

२०७३ मा निर्माण कम्पनीसँग ठेक्का सम्झौता भइ हालसम्म पाँच पटक म्याद थप्दा पनि उक्त सडक कालोपत्रे हुन सकेको छैन। निर्माण कम्पनीले पटक-पटक म्याद थप्दै काम नगर्दा यहाँका स्थानीय मर्कामा परेका छन्।

यस खण्डअन्तर्गत पर्ने २५ किलोमिटर मध्ये हालसम्म १४ किलोमिटर मात्रै कालोपत्रे भएको छ। वर्षौँदेखि सडक कालोपत्रे नहुँदा सडक वरपरका स्थानीय र यात्रुले हिउँदमा धुलो र बर्खामा हिलोका कारण सास्ती भोग्दै आएका छन्।

सडकको काठेखोला गाउँपालिका-५ र ६ का दर्जनौँ स्थानीय विस्थापितसमेत भएका छन्। २०७३ मा सम्झौता गरेर कालोपत्रेका लागि दुई निर्माण कम्पनीलाई जिम्मा दिइएको लोकमार्ग कार्यालयले जनाएको छ।

कार्यालयका अनुसार माथिल्लो बिहुँ खण्डमा कालोपत्रे गर्न एपिएस सिएफ इसिसी जेवी र तल्लो खण्डको भरत सिद्धिशाही जेभीले जिम्मा लिएको थियो। माथिल्लो खण्डमा काम गर्ने म्याद असार ५ गते र तल्लो अक्षते खण्डको असार २० गतेसम्म छ।

बिहुँ खण्डमा निर्माण कम्पनी बेला-बेला सम्पर्कविहीन हुँदा काम हुनसकेको छैन। सडकमा काम गर्ने मजदुर र उपकरण निकै न्यून हुँदा असार अन्तिमसम्म काम सक्ने सम्भावना नरहेको मध्यपहाडी लोकमार्ग कार्यालय पर्वतका इञ्जिनीयर पवन सुवेदीले बताए।

उनका अनुसार तल्लो खण्ड अन्तर्गत बाग्लुङ बजारदेखि अक्षतेसम्म कालोपत्रे गर्ने र सडक फराकिलो बनाउने, नाली निर्माण गर्ने काम भएको छ।

‘घोडाबाँधेदेखि गलकोट हटियासम्मको सडक भने एक दशक पहिलेनै कालोपत्रे भएको थियो। बाढीपहिरोका कारण उक्त खण्डमा अहिले मर्मत सम्भार हुँदैछ। मर्मतको काम तीव्र रुपमा भइरहेको छ’,  इञ्जिनीयर सुवेदीले भने।

इञ्जिनीयर सुवेदीले काम गर्नका लागि निर्माण व्यवसायीलाई ताकेदा गरेपनि अटेरी गरिरहेको बताए। निर्माण व्यवसायीले काम नगर्दा यात्रुले दुःख पाउनुका साथै आफूहरूलाई पनि समय-समयमा दबाव आइराख्ने उनको भनाइ थियो।

हालसम्म निर्माण कम्पनीले पाँच पटक म्याद थपेको इञ्जिनीयर सुवेदीले बताए। गत पुसमा निर्माण कम्पनी सम्पर्कविहीन भएको र कार्यालयले ठेक्का किन नछोड्ने भनि सूचना प्रकाशन गरेपछि सम्पर्कमा आएर काम गर्ने प्रतिबद्धता जनाएको उनले जानकारी दिए।

त्यस बेला काम सुरु गर्ने भने पनि अहिलेसम्म कामलाई निरन्तरता दिन नसकेको भन्दै असार २० गतेसम्म काम सम्पन्न नभए ठेक्का सम्झौता रोक्ने र विकल्प खोजिने सुवेदीले बताए।

‘निर्माण कम्पनीका कारण सबैलाई समस्या भएको छ, यतिका समय भयो ठेक्का सम्झौता भएको, तर काम हुँदैन, कार्यालयबाट हुने जति सबै सहयोग गरेका छौँ, काम गरे जतिको भुक्तानी पनि भएको छ, तर काम हुँदैन,’ इञ्जिनीयर सुवेदीले भने।

इञ्जिनीयर सुवेदीका अनुसार हालसम्म ७० प्रतिशत काम सम्पन्न भएको छ। तल्लो खण्ड आठ किलोमिटर र माथिल्लो छ किलोमिटर सडकमा काम भएको छ।

‘म्याद हुँदाहुँदै ठेक्का तोड्न लागियो भने निर्माण कम्पनीले अदातलमा मुद्दा हाल्ने सम्भावना भएकाले म्याद सम्म पर्खनु पर्नेछ। म्याद सकियो भने बोलपत्रबाट नयाँ प्रक्रिया अगाडि बढ्छ, असारको २० गतेसम्म काम सक्ने सम्भावना कम छ’, इञ्जिनीयर सुवेदीले भने।

स्थानीय कृष्णप्रसाद कँडेलले सम्बन्धित निकायले चसो नदिँदा ठेकेदार कम्पनीले काम गर्न आलटाल गरिरहेको बताए। कँडेलले २५औँ वर्षदेखि सडक छेउमा घर भएका नागरिकले सडकको हिलो र धुलो पन्छ्याएर दिन बिताउने गरेको गुनासो पोखे।

‘जब बर्खा लाग्छ, तब मेसिन लिएर काम गरे जस्तो गर्ने, १० दिनपछि कामदार र ठेकेदार नै हराउने गर्छन्’, स्थानीय कँडेलले भने। सुरुमा सडक आउँदा निकै खुसी लागेको स्थानीय कँडेलको भनाइ थियो।

उनले सडकले सुविधा दिने, जनजीवन फेरिने, व्यापार व्यवसाय गर्न सहज हुने स्थानीयको आशा निराशामा बदलिएको भन्दै हिलो र धुलोका कारण स्वास्थ्यमा समेत समस्या आउन थालेको बताए।

‘सडक छेउका कतिपय स्थानीय वर्षौँसम्म सडक कालापत्र हुन नसक्दा विस्थापित हुन बाध्य भएका छन्। कतिपय ठाउँमा सडक कालोपत्रे भएर भत्कियो, फेरि कालोपत्रे गर्ने बेला हुन लाग्यो यहाँको अवस्था यस्तो विजोग छ’, कँडेलले भने।

लोकमार्गको कूल एक हजार सात सय ७६ किलोमिटरमध्ये बाग्लुङ खण्डमा मात्रै एक सय ४२ किलोमिटर पर्छ। हालसम्म एक सय ३१ किलोमिटर सडक कालोपत्रे भइसकेको छ।

सडकको दुरावस्था हुँदा दुर्घटनाको जोखिम बढेको चालक रेमबहादुर विकले बताए। ठाउँ-ठाउँमा ठूलाठूला खाल्डाखुल्डी हुँदा गाडी बिग्री रहने र यात्रा गर्नै कठिन हुने उनले गुनासो पोखे।

चालक विकले भने, ‘यो बाटोमा गाडी चलाउन थालेको १०र१२ वर्ष भइसक्यो, यो अवधिमा सयौँ पटक सडकका कारण गाडी बिग्रियो, गाडी बिग्रिदा लाखौँ रुपैयाँ खर्च भयो, धेरै पटक दुर्घटनाबाट बचियो, हरेक वर्ष बाटो राम्रो बनाउला जस्तो गर्छ, तर अलिअलि काम गरेर छोड्छ, हामी त हैरान भइसक्यो, के गर्ने जसरी पनि गाडी चलाउनै पर्‍यो।’  -रासस