श्रीलंकाले सवारीसाधनको इन्धन कोटा बढाउने

श्रीलंकाले आगामी महिना सवारी साधनका लागि इन्धनको कोटा बढाउने भएको छ। त्यहाँकी ऊर्जामन्त्री कञ्चना विजेसेकेराले आगामी महिना सवारीसाधनका लागि इन्धनको कोटा बढाउने निर्णय गरेको बताइन्। इन्धनको मूल्य वृद्धि हुँदा कोटा बढाउने निर्णय गर्नुपरेको उनले बताइन्।

राष्ट्रिय इन्धन पास ‘क्यूआर’ प्रणालीमा हाल अनुमति दिइएको इन्धनको कोटा अर्को महिना बढाइने उनले ट्वीटरमा उल्लेख गरेका छन्। सिलोन पेट्रोलियम कर्पोरेसनका पदाधिकारीसँग बिहीबार बसेको बैठकले उक्त निर्णय गरेको हो।

विदेशी मौज्दातको अभावका कारण पर्याप्त मात्रामा इन्धन खरिद गर्न कठिनाइ भएपछि श्रीलङ्काले गत वर्ष इन्धन कोटा लागू गरेको थियो। श्रीलङ्काले विभिन्न रणनीतिहरूको अन्वेषण गर्यो र तीमध्ये एउटामा उत्पादक देशहरूमा स्थापित प्रतिष्ठित पेट्रोलियम कम्पनीहरूबाट देशमा पेट्रोलियम पदार्थहरू आयात, भण्डारण, वितरण र बिक्री गर्न रुचिको अभिव्यक्ति आमन्त्रण गर्नु समावेश थियो।

श्रीलङ्काको मन्त्रिपरिषद्ले तीन वटा विदेशी कम्पनीलाई लाइसेन्स प्रदान गर्न सहमति जनाइसकेको छ । सरकारले देशको खुद्रा इन्धन बजारलाई खुल्ला गराउन चाहन्छ ।

चीनको सिनोपेकलगायत विदेशी कम्पनीलाई हाल सरकारी स्वामित्वको सिलोन पेट्रोलियम कर्पोरेसनले सञ्चालन गर्दै आएको एक सय ५० वटा डिलरबाट सञ्चालित पेट्रोल पम्प उपलब्ध गराइनेछ । कम्पनीहरूलाई नयाँ स्थानमा ५० वटा नयाँ ग्यास स्टेसन स्थापना गर्न पनि अनुमति दिइनेछ ।