स्याङ्जामा आयकर नबुझाउने करदाताको संख्या ६ हजार नाघ्यो

वालिङ– गत २५ वैशाखसम्म स्याङ्जाका ६ हजार बढी करदाताले आयकरतर्फको आय विवरण बुझाएका छैनन्। करदाता सेवा कार्यालयमा दर्तामा कुल १४ हजार ४४७ संघ–संस्था, कम्पनी, समूह, समिति र फर्म रहेकामा ६ हजार ११० करदाताले आयकर विवरण नबुझाएका हुन्।

गत वैशाख मसान्तसम्म करदाता सेवा कार्यालयमा आयकरतर्फको आय विवरण नबुझाउने ६ हजार ११० करदातालाई आय विवरण बुझाउन पत्राचार तथा सूचना जारी गरिएको कार्यालय प्रमुख कर अधिकृत शोभाकान्त पंगेनीले बताए।

गत २५ चैतसम्म ६ हजार ५१५ जनाले आय विवरण बुझाउन बाँकी रहेमध्ये वैशाख मसान्तसम्म ४०५ जनाले आय विवरण बुझाएको उनको भनाइ छ।प्रत्येक आर्थिक वर्ष सकिएपछि असोज मसान्तभित्र आय विवरण बुझाउनुपर्नेमा करदाताले आय विवरण नुबझाएपछि पत्राचार तथा फोन सम्पर्क भइरहेको उनले जानकारी दिए।

‘कतिपयले व्यापार, व्यवसाय छाडे पनि स्थायी लेखा नम्बर बन्द गरेका छैनन् । व्यापार व्यवसाय छाडेको भए समयमै स्थायी लेखा नम्बर स्थगन गर्न करदातालाई पत्राचार गरिएको छ’, उनले भने। 

व्यापार व्यवसाय सञ्चालन गर्न छाडे पनि थाहा नभएकै कारण यी समस्या देखिएका हुन सक्ने भएकाले वस्तुगत संघ–संस्था, जिल्लास्थित उद्योग वाणिज्य संघमार्फत र स्वयं करदातालाई टेलिफोन वा म्यासेजमार्फत आयकर विवरण बुझाउन ताकेता गरिएको उनले बताए।

समयमै आयकर नबुझाउने करदातालाई आन्तरिक राजस्व कार्यालयबाट आयकर ऐन, २०५८ अनुसार अन्य कानुनी कारबाही तथा विलम्ब शुल्क लिने व्यवस्था रहेको छ। जिल्लाका ११ पालिकामध्ये करदाता सेवा कार्यालयले पत्राचार गरेसँगै सम्पर्कमा आई विवरण बुझाउन थालेकाले संख्या घट्दै गएको छ।

उनका अनुसार वैशाख मसान्तसम्म वालिङ नगरपालिकाभित्रका १ हजार ८८९, पुतलीबजार नगरपालिकाका १ हजार ३२०, भीरकोट नगरपालिकाका ३९०, चापाकोट नगरपालिकाका ५७९, गल्याङ नगरपालिकाका ६९६ करदाताले आयकर विवरण बुझाएका छैनन्।

आँधीखोला गाउँपालिकाका २२६, फेदीखोला गाउँपालिकाका २५८, बिरुवा गाउँपालिकाका १३५, अर्जुनचौपारी गाउँपालिकाका १७४, कालीगण्डकी गाउँपालिकाका २०१ र हरिनाश गाउँपालिकाका २४२ करदाताले आयकर विवरण बुझाउन बाँकी छ।