वैशाख मसान्तसम्म बजारमा ६ खर्ब २३ अर्ब पैसा परिचालन

काठमाडौं– राष्ट्र बैंकले वैशाख मसान्तसम्म बजारमा ६ खर्ब २३ अर्ब ८९ करोड ७८ लाख रुपैयाँ परिचालन (सर्कुलेसन) भएको बताएको छ। गत असार मसान्तको तुलनामा बजारमा पैसा परिचालन (पैसाको सर्कुलेसन) बढेको हो।

बजारमा अघिल्लो आव २०७८/७९ को असार मसान्तसम्म यस्तो सर्कुलेसन ६ खर्ब १२ अर्ब २ करोड ७६ लाख थियो। १० महिनामा बजारमा ११ अर्ब ८७ करोड २ लाख रुपैयाँ बढी नगद सर्कुलेसन बढेको हो।

समीक्षा अवधिमा विभिन्न बैंक तथा वित्तीय संस्थामा २ खर्ब १२ अर्ब ८३ करोड ८ लाख रुपैयाँ निक्षेप जम्मा भएको छ भने सरकारका तर्फबाट १ खर्ब ८४ अर्ब ५९ करोड ३७ लाख रुपैयाँ र अन्य वित्तीय संस्थामा १७ अर्ब ८४ करोड १ लाख ५५ हजार जम्मा भएको राष्ट्र बैंकले जनाएको छ।