रुकुम पश्चिममा जिप दुर्घटना, १४ मध्ये ५ जनाको अवस्था गम्भीर

काठमाडौं– रुकुम पश्चिमको बाँफीकोट गाउँपालिका– ८ दुलीमा जिप दुर्घटना हुँदा घाइते भएका १४ मध्ये ५ जना गम्भीर घाइते भएको रुकुम पश्चिम प्रहरीले बताएको छ।

सानीभेरी गाउँपालिका–३ घ्युढुंगाबाट मुसिकोटतर्फ जाँदै गरेको लु१ज१७४७ नम्बरको जिप आज बिहान करिब साढे ८ बजेतिर दुर्घटनामा परेको जिल्ला प्रहरी कार्यालय रुकुम पश्चिमका इन्सपेक्टर विष्णु श्रेष्ठले जानकारी दिए।

सडकबाट करिब ३ सय मिटर तल खसेको जिपमा १५ जना सवार थिए। घाइतेको उद्धार जारी रहेको प्रहरीले बताएको छ। 

गम्भीर घाइते भएकालाई हेलिकोप्टरबाट बाँकेको कोहलपुर लैजाने तयारी भइरहेको रुकुम पश्चिमका प्रमुख जिल्ला अधिकारी हरिप्रसाद पन्तले जानकारी दिए।