ओलम्पिक छनोट खेल्ने महिला टोलीलाई बिदाई

काठमाडौं- म्यानमारमा आयोजना हुने ओलम्पिकका लागि एशियाली छनोट प्रतियोगितामा सहभागि हुन जाने नेपाली महिला टोलीलाई बिहिबार एक कार्यक्रमबीच बिदाई गरेको छ । टोलीलाई राष्ट्रिय खेलकुद परिषद्का सदस्य सचिव केशवकुमार बिष्टले एन्फा कम्प्लेक्समा बिदाई गरे ।

टोलीमा २२ खेलाडी, दुई प्रशिक्षक, एक टोली नेता र एक व्यवस्थापक रहेका छन् । प्रशिक्षकमा हरि खड्का र मृगेन्द्र प्रसाद मिश्र, टोली नेतामा दिर्घ बहादुर केसी र व्यवस्थापकमा कमला हिराचन थकाली रहेका छन् ।

नेपाली टोलीको समूहमा भारत, म्यानमार र बंगलादेश रहेका छन् । पहिलो पटक ओलम्पिक छनोट प्रतियोगितामा सहभागिता जनाउन लागेको नेपालले आफ्नो पहिलो खेल ८ नोभेम्बरमा भारतसँग प्रतिस्पर्धा गर्ने छ भने ११ नोभेम्बरमा म्यानमार र १३ नोभेम्बरमा बंगलादेशसँग प्रतिस्पर्धा गर्नेछ ।

यस अघि नेपाली टोलीले चाईनामा तीन मैत्री पूर्ण खेल खेल्ने छ । नेपाली टोलीले अक्टोबर २९ र ३१ तारिखमा बेईजिङ्ग फोनिक्स महिला फुटबल टिमसँग दुई मैत्रीपूर्ण खेल खेल्ने कार्यक्रम रहेको एन्फाले जनाएको छ । यस्तै ३० तारिखमा बेईजिङ्ग स्पोर्टस् युनिभर्सिटीसँग मैत्रीपूर्ण खेल खेल्ने कार्यक्रम रहेको छ । २ नोभेम्बर टोली चाईनाबाट म्यानमार प्रस्थान गर्ने छ ।

नेपाली टोलीलाई शुभकामना सहित बिदाई गर्दै सदस्य सचिव बिष्टले नेपाली महिला टोलीले पहिलो पटक प्राप्त गरेको अवसरलाई सदुपयोग गर्ने भन्दै टोलीले राष्ट्रको नाम उच्च राख्ने बिश्वास ब्यक्त गरे । नेपाली टोली शुक्रबार चाईना प्रस्थान गर्ने कार्यक्रम रहेको छ ।