दालको कच्चा पदार्थमा एक प्रतिशतमात्र भन्सार लगाउन माग

काठमाडौं- उद्योगीहरूले गेडागुडीको कच्चा पदार्थमा भन्सार बढी भएको भन्दै घटाउन माग गरेका छन्। अहिले लगाइँदै आएको भन्सारले उद्योगलाई टिक्न नसक्ने स्थिति आएको भन्दै त्यसलाई हटाउनुपर्ने माग उनीहरुले गरेका हुन्।

आइतबार पत्रकार सम्मेलन गरेर नेपाल चामल तेल दाल उद्योग संघले तयारी र कच्चा गेडागुडीमा एउटै भन्सार भएकोले समस्या आएको जानकारी दिएको हो। अहिले तयारी मुसुरो, रहर दाल, मासको गेडा र चनाको आयात गर्दा १० प्रतिशत भन्सार लाग्दै आएको छ। तर यसलाई तयारी गेडागुडी र कच्चा पदार्थलाई फरक–फरक भन्सार शुल्क लागाउनुपर्ने उद्योगीको माग छ।

नेपाल चामल तेल दाल उद्योग संघका अध्यक्ष सुबोधकुमार गुप्ताले सरकारले बन्द हुन लागेका उद्योगलाई जीवन दिनुपर्ने बताए। नेपालमा भारतको खाद्य वस्तु मात्र आउने भएकाले त्यसलाई कम गर्न पनि देशका उद्योगहरूलाई संरक्षण गर्नुपर्ने उनले बताए। 'नेपाल भारतीय बजारको रूपमा परिचित हुँदै गएको छ। युवा विदेशीएका छन्। गाउँमा खेतबारी बाँझो छ,' उनले भने, 'सरकारले उचित नीति ल्याए खाद्यान्नमा आत्मनिर्भर मात्र नभएर निर्यात पनि गर्न सकिन्छ। दालका उद्योग धेरै बन्द भएका छन्। २०–२५ प्रतिशत मात्र सञ्चालनमा छन्। कच्चा दाल तथा गोडागुडी आयातमा सहुलियत दिनुपर्छ।'  

सीमामा सीसीटीभी राखेर तोरी निकासीलाई कडाइ गर्नुपर्ने पनि बताइएको छ। तेलमा लाग्दै आएको १३ प्रतिशत भ्याट खारेज गर्न पनि माग गरिएको छ। बैंकको प्रिमियम दुई प्रतिशतभन्दा बढी राख्न नहुने पनि बताइएको छ। 

संघका पूर्वअध्यक्ष कुमुद दुगडले तथ्यांक नहुँदा पनि समस्या उत्पन्न भएको बताए। 'डाटा नहुँदा समस्या भएको छ। हाम्रो तथ्यांक नै सम्पत्ति हो। हाम्रो सिस्टममा डाटा नहुँदा कसले कति कहाँबाट उत्पादन हुन्छ भन्ने कुरा नै छैन। कृषि भूमि छुट्याउन आवश्यक छ,' उनले भने। जमिन बाँझो राख्न नपाउने भन्ने नीति कडाइँका साथ लागु गर्नुपर्ने बताइएको छ।