शरणार्थी प्रकरणको फाइल सरकारी वकिललाई बुझाउँदै प्रहरी

काठमाडौं- नेपाली नागरिकलाई नक्कली भुटानी शरणार्थी बनाएर अमेरिका लैजाने प्रलोभन देखाएर करोडौं रुपैयाँ ठगी भएको विषयमा अनुसन्धान गरिरहेको नेपाल प्रहरीले आफ्नो अनुसन्धान अन्तिम चरणमा पुर्‍याएको छ। अनुसन्धान सकेर आजै जिल्ला सरकारी वकिलको कार्यालयलाई प्रतिवेदन बुझाउने तयारी छ।
दुई महिना लामो अनुसन्धानका क्रममा प्रहरीले १६ जनालाई पक्राउ गरेर हिरासतमा राखेको छ। केही भने अझै फरार छन्। प्रहरी नियन्त्रणमा नआएकाहरुलाई फरार प्रतिवादीको रुपमा मुद्दा चलाइनेछ। प्रतिवादीको संख्या अझै टुंगो लागेको छैन।

यो प्रकरणमा प्रहरीले ठगीसँगै संगठित अपराधको कसुरमा पनि अनुसन्धान अगाडि बढाएको थियो। यो कसुरमा अनुसन्धान गर्न प्रहरीलाई दुई महिनाको समय हुन्छ। यो समयभित्र अदालतमा मुद्दा दर्ता भइसक्नुपर्ने भएकाले प्रहरीले आज प्रतिवेदन सरकारी वकिल कार्यालयमा बुझाउन लागेको हो। सरकारी वकिल कार्यालयले प्रहरीलाई जतिसक्दो चाँडो फाइल पठाउन भनेको छ। प्रहरीले पठाएको फाइल अध्ययन गरेर अभियोगपत्र तयार गर्न पनि केही समय लाग्छ।

यो प्रकरणमा अहिलेसम्म १६ जना पक्राउ परेका छन्। पक्राउ पर्नेमा कांग्रेसका नेता तथा पूर्वगृहमन्त्री बालकृष्ण खाण, एमालेका सचिव तथा पूर्वउपप्रधानमन्त्री समेत रहेका सांसद टोपबहादुर रायमाझी, नेपाल सरकारका सचिव टेकनारायण पाण्डे, तत्कालीन गृहमन्त्री तथा एमाले उपाध्यक्ष रामबहादुर थापा बादलका
सुरक्षा सल्लाहकार इन्द्रजित राई, भुटानी शरणार्थीका नेता टेकनाथ रिजाल, कांग्रेसका पूर्वसांसद आङटावा शेर्पा, खाणका सहयोगी नरेन्द्र केसी, गृह मन्त्रालय मातहतको हज समितिका अध्यक्ष शमशेर मिया, टोपबहादुर रायमाझीका छोरा सन्दीप रायमाझी, केशव दुलाल, सानु भण्डारी, सन्देश शर्मा, पूर्ववडाध्यक्ष सागर राई, टेक गुरुङ, गोविन्द चौधरी र रामशरण केसी छन्।