सवारी दुर्घटनामा तीनको मृत्यु, डुबेर चारजनाको ज्यान गयो

काठमाडौं- उदयपुर, बेलका नगरपालिका-४ लालबजारस्थित सडकमा प्र.२-०३-००१ ख४३०९ नम्बरको टिपरको ठक्करबाट पैदलयात्री सोही ठाउँ बस्ने नमराज राना मगरकी छोरी ४ वर्षीया एन्जिल राना मगरको शुक्रबार दिउँसो घटनास्थलमै मृत्यु भएको छ। टिपर चालकलाई प्रहरीले नियन्त्रणमा लिएको छ।

सर्खेत, बराहताल गाउँपालिका-८ मसिनास्थित सडकमा अछामबाट नेपालगंजतर्फ जाँदै गरेको सु प्र ०१००१ ख ३०७२ नम्बरको हाईसले क.प्र ०२००२ प ६७९६ नम्बरको स्कुटरलाई शुक्रबार दिउँसो ठक्कर दिँदा स्कुटर चालक वीरेन्द्रनगर नगरपालिका-३ बस्ने २५ वर्षीय हिरालाल कडेंलको मृत्यु भएको छ। दुर्घटनामा गम्भीर घाइते भएका उनको प्रदेश अस्पताल सुर्खेतमा उपचारको क्रममा मृत्यु भएको हो। साथै दुर्घटनामा घाइते भएका स्कुटरमा सवार १ जनाको सोही अस्पतालमा उपचार भइरहेको छ। हाईस चालकलाई प्रहरीले नियन्त्रणमा लिएको छ।

बारा, महागढीमाई नगरपालिका-१ स्थित बड्का मठ नजिकै बरियारपुरबाट गंजभवानीपुरतर्फ जाँदै गरेको लु.८ प ६९६१ नम्बरको मोटरसाइकलको ठक्करबाट साईकलयात्री सोही ठाउँ बस्ने ७१ वर्षीय पुनदेव महत्तोको शुक्रबार साँझ मृत्यु भएको छ। ठक्करबाट गम्भीर घाइते भएका उनको एलएस न्यूरो अस्पताल परवानीपुरमा उपचारको क्रममा मृत्यु भएको हो। मोटरसाइकल चालकलाई प्रहरीले नियन्त्रणमा लिएको छ। दुर्घटनाका सम्बन्धमा प्रहरीले थप अनुसन्धान गरिरहेको छ।

मृत फेला
रुपन्देही, मायादेवी गाउपालिका-२ पिपराहवा बस्ने २४ वर्षीय पिन्टु लोध सोही ठाउँस्थित कोईलाहवा नदीको सुख्खा नालामा शुक्रबार मृत अवस्थामा फेला परेका छन्।

महोत्तरी, सम्सी गाउँपालिका-६ सम्सीटोलस्थित पोखरीमा सोही ठाउँ बस्ने १९ वर्षीय धर्मेन्द्र महत्तो शनिबार मृत अवस्थामा फेला परेका छन्। शुक्रबार दिउँसो पोखरीमा नुहाउने क्रममा डुबेर बेपत्ता भएको भन्ने खबर प्राप्त हुनासाथ प्रहरी चौकी सम्सीबाट खटिएको प्रहरीले खोजी गर्ने क्रममा शव फेला पारेको हो। यस सम्बन्धमा प्रहरीले थप अनुसन्धान गरिरहेको छ।

डुबेर मृत्यु
बाँके, खजुरा गाउँपालिका-७ सिमलघारी बस्ने ढल बहादुर रास्कोटीको छोरा १४ वर्षीय खगेन्द्र रास्कोटीको सोही ठाउँस्थित मानखोलामा पौडी खेल्ने क्रममा डुबेर शुक्रबार साँझ मृत्यु भएको छ।

सर्लाही, चन्द्रनगर गाउँपालिका-२ बबरगन्ज मुसहरटोल बस्ने गणेश महतोको छोरा ८ वर्षीय अनुस महतोको सोही ठाउँस्थित पोखरीमा नुहाउने क्रममा डुबेर शुक्रबार दिउँसो मृत्यु भएको छ।

कैलाली, घोडाघोडी नगरपालिका-५ सेउकलीया बस्ने जयराम नेपालीको छोरी १२ वर्षीया श्रृष्टी नेपालीको सोही ठाउँस्थित कान्द्रा नदीमा डुबेर शुक्रबार राति मृत्यु भएको छ। नुहाउने क्रममा डुबी अशक्त भएकी उनको सेती प्रादेशिक अस्पताल धनगढीमा उपचारको क्रममा मृत्यु भएको हो।

बर्दिया, गुलरिया नगरपालिका-४ स्थित बबई नदीमा पौडी खेल्ने क्रममा डुबेर सोही ठाउँ बस्ने धकेन्द्र बुढाकी छोरी ९ वर्षीया तिरिसा बुढाको शनिबार बिहान मृत्यु भएको छ।

मोरङ, विराटनगर महानगरपालिका-१८ डमाडेगी बस्ने गौतम मण्डलकी छोरी १८ महिनाकी छोटी मण्डलको आफ्नै घर अगाडिको नालीमा डुबेर शनिबार बिहान मृत्यु भएको छ। यस सम्बन्धमा प्रहरीले थप अनुसन्धान गरिरहेको छ।

करेन्ट लागेर मृत्यु
कैलाली, कैलारी गाउँपालिका-३ ओमनगर शिविर बस्ने ३२ वर्षीय कुन्कु चौधरीको करेन्ट लागेर शनिबार दिउँसो मृत्यु भएको छ। घोडाघोडी नगरपालिका-४ सुन्दरपुरस्थित कौवा खोलामा करेन्ट लगाई माछा मार्ने क्रममा करेन्ट लागेर गम्भीर घाइते भएका उनको उपचारकोलागि सुम्दरपुर बजारस्थित बिएम क्लिनिकतर्फ लैजाने क्रममा बाटोमै मृत्यु भएको हो।