यात्रुले जहाजभित्रै मुसो देखेपछि जनकपुर–काठमाडौं उड्न स्थगित!

काठमाडौं– बुद्ध एयरको जहाज जनकपुरबाट काठमाडौं उड्नै लाग्दा यात्रुले मुसा देखेपछि उडान स्थगित गरिएको छ। जनकपुरबाट काठमाडौं उड्न लागेको जहाजमा ४९ यात्रुले बोर्डिङ पास लिइसकेका थिए।

शनिबार बिहान सवा ९ बजे काठमाडौं उड्न लागेको जहाजमा यात्रुले मुसा देखेपछि उडान स्थगित गरिएको नागरिक उड्डयन प्राधिकरणका प्रवक्ता जगन्नाथ निरौलाले बताएका हुन्। बुद्ध एयरको जहाज साढे ८ बजे काठमाडौंबाट यात्रु लिएर जनकपुर पुगेको थियो।

‘काठमाडौंबाटै उडेको जहाज थियो। जनकपुरबाट यात्रु बोकेर काठमाडौं आउनै लागेको थियो। जहाजमा बसिसकेका एक यात्रुले मुसा देखेछन्। त्यसपछि तत्काल उडान रोकेका हौं,’ उनले भने। 

जहाजमा मुसा देखिएको खबर पाएपछि काठमाडौंबाट जनकपुर जाने इन्जिनियरको टोली परीक्षण गरेपछि मात्रै उडान अनुमति दिइने निरौलाको भनाइ छ।