स्टार्टअपका लागि महानगरले खुलायो अवसर

काठमाडौं– काठमाडौं महानगरपालिकाले स्टार्टअप गर्न चाहनेका लागि आइडिया बैंक कार्यक्रममा सहभागी हुन काठमाडौं आवेदन खुलाएको छ।महानगर प्रमुख बालेन्द्र शाह (बालेन)ले शुक्रबार सामाजिक सञ्जालमा भिडिओ पोस्ट्याउँदै  आवेदनका लागि आह्वान गरेका हुन्।

आफ्नो चुनावी घोषणापत्र तथा काठमाडौं महानगरको आर्थिक वर्ष २०७९÷८० को नीति तथा कार्यक्रममा समावेश भएको आइडिया बैंक कार्यक्रममा सहभागी हुन बालेनले भिडिओ सन्देशमा इच्छुकलाई आग्रह गरेका छन्।

आइडिया बैंकको प्रमुख उद्देश्य दक्ष/अदक्ष जनशक्ति, विद्यार्थी, लगानीकर्ता तथा उद्यमशीलता विशेषज्ञको ब्रिज (पुल)का रूपमा महानगरमै बसेर सोचलाई योजना र योजनालाई व्यवसाय बनाउनु रहेको बालेनले बताएका छन्।

उनले भनेका छन्, ‘तपाईंसँग कुनै स्टार्टअप छ, जुन तीन वर्ष कटेको छैन अथवा कुनै आइडिया छ, जसले काठमाडौं महानगर तथा देशभरका उद्यमशीलता तथा सिर्जनात्मक काम गर्न सकिन्छ भने तपाईंहरूको त्यो आइडियालाई विभिन्न पाँच क्याटगोरीमा हामीले लिन कोसिस गरिरहेका छौं।’

बालेनले छुट्याइएका पाँच क्याटगोरीमा आफ्ना आइडियालाई सबमिट गर्न सुझाउँदै इच्छुकलाई उद्यमी बन्न कसैले नरोक्ने र त्यसमा महानगरको साथ रहने प्रण गरेका छन्।

स्टार्टअपका लागि आवश्यक लगानीकर्ता, प्लेटफर्म, विज्ञापनजस्ता काममा महानगरले सघाउने उनको प्रतिबद्धता छ। आवेदन दिने अन्तिम समय १९ जेठसम्म तोकिएको छ। महानगरले पाँच विधा तोकेर आवेदन खुलाएको हो।