नक्कली शरणार्थी प्रकरणमा पक्राउ परेका १६ मध्ये एक जना सक्कली शरणार्थी

काठमाडौं– प्रहरीले नक्कली भुटानी शरणार्थी प्रकरणमा मुछिएका आशंकित आरोपीको संख्या १६ पुगेको छ।

बिहीबार दिउँसो नेपाल हज समिति अध्यक्ष शमशेर मियाँ र बेलुकी भुटानी शरणार्थीका नेता टेकनाथ रिजाल पक्राउ परेका थिए। रिजाल र मियाँ पक्राउ परेसँगै यो प्रकरणमा प्रहरीले १६ जनालाई नियन्त्रणमा लिएर आवश्यक अनुसन्धान गरिरहेको छ।

जिल्ला प्रहरी परिसर काठमाडौंका प्रमुख एसएसपी दानबहादुर कार्कीले पक्राउ परेका रिजालमाथि थप अनुसन्धान गर्न अदालतबाट दुई दिनको म्याद लिएर कारबाही प्रक्रिया अगाडि बढाइउको जानकारी दिए।

नक्कली शरणार्थी प्रकरणमा प्रहरीले यसअघि प्रहरीले एमालेबाट निलम्बित सचिव टोपबहादुर रायमाझी र कांग्रेस नेता बालकृष्ण खाँण, आङ्टाबा शेर्पासहित १४ जनालाई पक्राउ गरी अनुसन्धान गर्दै आएको छ।

नेपाली नागरिकलाई नक्कली भुटानी शरणार्थी बनाउने धन्धामा संलग्न रहेको आरोपमा प्रहरीले सरकारका सचिव टेकनारायण पाण्डे, तत्कालीन गृहमन्त्री रामबहादुर थापाका बादलका सुरक्षा सल्लाहकार इन्द्रजित राईलाई समेत अनुसन्धानका लागि हिरासतमा लिएको छ।

केशव दुलाल, टंक गुरुङ, सानु भण्डारी, सागर राई, पूर्वगृहमन्त्री खाँणका स्वकीय सचिव नरेन्द्र केसी, सन्देश शर्मा, टोपबहादुर पुत्र सन्दीप रायमाझी, रामशरण केसी र गोविन्द चौधरी प्रहरी अनुसन्धानकै क्रममा हिरासतमा छन्।