नक्कली शरणार्थी प्रकरण: टोपबहादुर र छोरा सन्दीपविरुद्ध पक्राउ पुर्जी 

काठमाडौं- नेपालीलाई नक्कली शरणार्थी बनाएर अमेरिका लैजाने घटनामा मुछिएपछि पूर्व ऊर्जामन्त्री तथा नेकपा एमालेका नेता टोपबहादुर रायामाझी र उनका छोरा सन्दीप रायमाझीविरुद्ध पक्राउ पुर्जी जारी भएको छ। रायामाझी सांसदसमेत हुन्।

प्रहरीले बुधबार काठमाडौं जिल्ला अदालतबाट टोपबहादुर र सन्दीपविरुद्ध पक्राउ पुर्जी लिएको हो।

आज नै प्रहरीले यसै विषयमा उपराष्ट्रपति कार्यालयका सचिव टेकनारायण पाण्डेलाई नियन्त्रणमा लिएर सोधपुछ गरेको छ। प्रहरीका अनुसार पाण्डेलाई टेकुस्थित प्रहरी परिसरमा राखिएको छ। प्रहरीले आज नै उनलाई पक्राउ गर्न अदालतबाट अनुमित लिएको थियो।

गत वर्ष उनी गृह मन्त्रालयमा सचिव थिए। मन्त्रालयको सचिव भएकै अवस्थामा नक्कली शरणार्थी प्रकरण र गिरोहसँगको साँठगाठमा उनी मुछिएका थिए। 

यही प्रकरणमा पूर्व गृहमन्त्री रामबहादुर थापाका सल्लाहकार इन्द्रजित राई पक्राउ परिसकेका छन्। यसअघि प्रहरीले यस विषयमा सागर राई, केशव दुलाल र सानु भण्डारीलाई पनि पक्राउ गरिसकेको छ। 

उनीहरूले विभिन्न प्रलोभन देखाएर र विश्वासमा पारेर ५० जनाभन्दा बढी मानिसबाट ३ करोड २४ लाख रुपैयाँ ठगी गरेको पाइएको छ।