इटहरीका मेयरले कार्यालयमा नै थुने सेवाग्राही

इटहरी– सुनसरीको इटहरी उपमहानगरपालिकाका प्रमुख  द्वारिकलाल चौधरीले सेवाग्राहीलाई बुधबार कार्यालयमै थुनेका छन्। इटहरी– ४ का यामप्रसाद ढकाललाई आफ्नो कार्यालयमा बोलाएर मेयर चौधरीले थुनिदिएका हुन्। 

प्रमुख चौधरीले सार्वजनिक जग्गा मिचेर घर बनाएको भन्दै नगर प्रहरी लगाएर कार्यालयमा ढकाललाई बोलाएको स्रोतले बताएको छ। कार्यालयमा पुगेपछि घर भत्काउनुपर्‍यो भन्दै धम्की दिएका प्रमुख चौधरीले थुनेर भागेको ढकालको आरोप छ। 

आफू घर भत्काउन नसक्ने प्रतिक्रिया दिएपछि बाहिरबाट चुकुल लगाएर नगर प्रमुख चौधरी गाडी चडेर हिँडेको उनले बताए। उनले भने, ‘सात दिन भित्र घर भत्काउने कि थुनेर राखौँ भन्दै मलाई केही घण्टा बाहिरबाट ढोका लगाएर थुनेर राखे।’ 

नेपाली काँग्रेस इटहरीका सभापति हेमकर्ण पौडेलसहित दर्जनौँ कार्यकर्ता इटहरी उपमहानगरपालिकाको कार्यालय पुगी ढकाललाई उद्धार गरी ढकाललाई परिवारको जिम्मा लगाउनुका साथै प्रमुखको कार्यकक्षमा तालाबन्दी गरेका थिए। 

पौडेलले कार्यालयमै सेवाग्राहीलाई थुन्नु अनैतिक, अमर्यादित र अव्यवहारिक भएको कांग्रेको भनाइ छ।