एसीसी प्रिमियर कप: नेपालले कतारलाई ६८ रनले हरायो

काठमाडौं– कीर्तिपुरमा जारी एसीसी प्रिमियर कप प्रतियोगिताको समूह चरणको अन्तिम खेलमा नेपालले कतारलाई ६८ रनले पराजित गरेको छ।

सन्दीप लामिछानेले पाँच विकेट लिएपछि कतार ८९ रनमा अलआउट हुन पुगेको हो। जितसँगै नेपाल समूह ‘ए’को विजेता बन्दै सेमिफाइनल प्रवेश गरेको छ।

नेपालले जितका लागि कतारसामु १५८ रनको लक्ष्य प्रस्तुत गरेको थियो। कतारले २५.१ ओभरमा सबै विकेट गुमाउँदै ८९ रन मात्र बनाउन सक्यो। सोमपाल कामीले तीन तथा ललित राजवंशीले दुई विकेट लिए।

यसअघि टस हारेर पहिले ब्याटिङ गरेको नेपालले ४०.३ ओभरमा सबै विकेट गुमाएर १५७ रन बनाएको थियो। नेपालका लागि सन्दीप लामिछानेले नटआउट रहँदै सर्वाधिक ४२ रन बनाए।

उनले ५८ बलमा ६ चौकाको मद्दतले सो रन बनाउन सफल भए। यसलाई सन्दीपले एकदिवसीय क्रिकेटमा बनाएको सर्वाधिक व्यक्तिगत स्कोर मानिएको छ। सुरुआती खेलमा खराब प्रदर्शन गरेको नेपालले ९ रनमा दुई विकेट गुमाएको थियो।