अनलाइन नक्सापास सेवा सुरु गर्दै मेयर बालेनले भने- ३ महिना लाग्ने काम अब २५ दिनमै हुन्छ

काठमाडौं- नयाँ वर्ष २०८० सालको पहिलो दिन काठमाडौं महानगरपालिकाले पूर्ण रुपमा अनलाइन नक्सापास प्रणालीको सुरुआत गरेको छ। शुक्रबार काठमाडौ महानगरपालिका मेयर बालेन्द्र शाहले उक्त प्रणालीको सुरुआत गरेको जानकारी दिएका छन्। 

उनले फेसबुकमार्फत भनेका छन्, ‘काठमाडौं महानगरपालिकामा आजदेखि पूर्णरुपमा अनलाइन नक्सापास प्रणाली सुरुआत गरेका छौं। यो प्रणालीको प्रयोगबाट घर तथा संरचना बनाउँदा घरनक्सा दर्ता अनलाइनबाटै पेस गर्न सकिने छ।

यसैगरी सँधियारको सूचना, राजस्व तिर्ने, फिल्ड भिजिट मिति तोक्ने तथा प्लिन्थ लेभलसम्मको इजाजतलगायत सम्पूर्ण प्रक्रिया महानगर तथा मातहतका कार्यालयमा नगई अनलाइनबाट नै सेवा लिन सकिने महानगर प्रमुख शाहले उल्लेख गरेका छन्। उक्त प्रणालीबाट पहिले २–३ महिना लाग्ने प्रक्रिया बढीमा २५ दिनमा हुने दाबी गरिएको छ।

यसका लागि सर्भरको स्तरोन्नतिसहित सफ्टवेयरका धेरै सुविधाहरू सुधार गरिएको दाबी गर्दै यो प्रणालीसँगै विचौलिया प्रवृत्ति, वारेसनामा पद्धति, आर्थिक अनियमितता लगायतको अन्त्य भई पारदर्शी र सहज प्रक्रिया सञ्चालन हुने जनाएको छ।