प्रिमियर लिगमा क्रिस्टल प्यालेसमाथि आर्सनलको सहज जित

काठमाडौं- इङ्लिस प्रिमियर लिग फुटबलमा शीर्ष स्थानको आर्सनलले क्रिस्टल प्यालेसलाई ४–१ गोल अन्तरले पराजित गरेको छ।

गएराति भएको खेलको २८औं मिनेटमा आर्सनलका गाब्रियल मार्टिनेलीले गोल गर्दै सुरुआती अग्रता दिलाएका थिए। त्यसपछि ४३औं मिनेटमा बुकायो साकाले गोल गरे भने ५५औं मिनेटमा ग्रानिट जाकाले  गोल गरे। यस्तै खेलको ७४औं मिनेटमा बुकायो साकाले फेरि अर्को गोल गर्दै आर्सनललाई ४–१ को जित दिलाए।

क्रिस्टल प्यालेसका लागि खेलको ६३औं मिनेटमा जेफ्री श्लपले एक गोल गरे। जितसँगै आर्सनलले म्यानचेस्टर सिटीसँगको अङ्क दूरी बढाएको छ। 

आर्सनलले २८ खेलमा ६९ अङ्क जोडेको छ भने दोस्रो स्थानमा रहेको सिटीको २७ खेलमा ६१ अङ्क छ। यस्तै, तेस्रो स्थानमा रहेको म्यानचेस्टर युनाइटेडको ५० अङ्क छ।