बालुवाटारमा क्रिकेट टोलीलाई प्रधानमन्त्रीको बधाइ [तस्बिहरू]

काठमाडौं- प्रधानमन्त्री पुष्पकमल दाहाल प्रचण्डले नेपाली क्रिकेट खेलाडीलाई बालुवाटारमा बोलाएर बधाइ ज्ञापन गरेका छन्। विश्वकप क्रिकेट प्रतियोगिताको क्वालिफायरमा प्रवेश गरेको नेपाली क्रिकेट टोलीलाई प्रचण्डले शुक्रबार बिहान बधाई तथा शुभकामना ज्ञापन गरेको प्रधानमन्त्रीको सचिवालयले जनाएको छ।

बिहीबार त्रिवि खेल मैदानमा प्रधानमन्त्री प्रचण्डले आफैं उपस्थित भएर खेलाडीलाई हौसला प्रदान गरेका थिए। 

घरेलु मैदानमा यूएईमाथि नेपालले ९ रनको जित निकालेको थियो। नेपालले सन् २०२० को फेब्रुअरीमा अमेरिका र ओमानसँग खेल्दै लिग २ को त्रिकोणात्मक सिरिजको सुरुवात गरेको थियो।

यो जितसँगै नेपालले पहिलो पटक ओडीआई ग्लोबल क्वालिफायर खेल्ने छ। नेपालले अब जिम्बाबेमा हुने आईसीसी ग्लोबल छनोटका खेलमा सहभागीता जनाउने छ।

यसैबीच सरकारले विश्वकप क्रिकेट प्रतियोगिताको क्वालिफायरमा प्रवेश गर्न सफल  नेपाली क्रिकेट खेलाडीलाई जनही ३ लाख रुपैयाँ सम्मानस्वरुप उपलब्ध गराउने भएको छ। खेलाडीलाई बधाइ तथा शुभकामना दिँदै प्रधानमन्त्री प्रचण्डले यस्तो बताएका हुन्।

प्रधानमन्त्री प्रचण्डले भने, ‘यसअघि पनि सरकारले तपाईंहरूलाई जनही २–२ लाख राशीले पुरस्कृत गरिसकेको छ। आज म तपाईंहरूलाई जनही ३ लाख रुपैयाँ पुरस्कार प्रदान गर्ने घोषणा गर्दछु।’

यसअघि स्कटल्यान्ड र नामिबिया सम्मिलित त्रिकोणात्मक शृंखला जितेलगत्तै गत महिना खेलाडीलाई प्रधानमन्त्रीले बालुवाटारमै बोलाएर सम्मान गर्दै जनही २ लाख दिने घोषण गरेका थिए। 
नेपाली टोलीले पुनः यूएई र पपुवा न्युगिनी सम्मिलित शृंखला जितेको र विश्वकप छनोटमा पुग्न सफल भएकाले प्रधानमन्त्रीले जनही ३ लाख दिने घोषणा गरेका हुन्।

प्रधानमन्त्रीको आजको घोषणासहित अब खेलाडीले ५ लाख रुपैयाँ नगद पुरस्कार पाउने राष्ट्रिय खेलकुद परिषद्का सदस्य सचिव टंकलाल घिसिङले बताए।