विवादका कारण रोकियो नेपाल टी२० लिग

काठमाडौं- कीर्तिपुरमा जारी पहिलो संस्करणको नेपाल टी २० लिग विवादका कारण रोकिएको छ। खेलाडीहरुले पारिश्रमिक नपाएपछि नखेल्ने निर्णय लिएका हुन्।

सम्झौताअनुसार खेल सुरु हुनुअघि ४० प्रतिशत पाउनुपर्ने र प्रतियोगिता चलिरहँदा ६० प्रतिशत पारिश्रमिक पाउने सहमति भए पनि हालसम्म खेलाडीले कुनै रकम पाएका छैनन्।

तालिका अनुसार आज विराटनगर सुपर किंग्स र काठमाडौं नाइट्सको खेल हुनुपर्ने थियो। खेलका लागि दुवै टिम मैदानमा पुगे पनि टस नै हुन सकेन।

नेपाल क्रिकेट संघ क्यानले भारतीय कम्पनी सेभेन थ्री स्पोर्ट्सलाई साझेदार बनाएर प्रतियोगिता गरेको हो। पटकपटक मिति सारेर मंसिर २८ देखि सुरु भएको नेपाल टी–२० लिगमा सोमबारसम्म ३४ मध्ये २० खेल सम्पन्न भइसकेका छन्।

तर, पछिल्लो समय आयोजक सेभेन थ्री स्पोर्ट्स कम्पनीका साझेदार नै सम्पर्कमा नआएको बताइएको छ। खेलाडी तथा अफिसियलले यसअघि नै सोमबारसम्म आफूले पाउनुपर्ने परिश्रमिक नपाए नखेल्ने बताएका थिए। केही विदेशी खेलाडीले नेपाल छाडिसकेका छन्।

नेपाल टी–२० लिगमा विराटनगर सुपर किंग्स, काठमाडौं नाइट्स, जनकपुर रोयल्स, लुम्बिनी अल स्टार्स, पोखरा एभेन्जर्स, र फार वेस्ट युनाइटेड गरी ६ फ्रेन्चाइज टोलीले प्रतिस्पर्धा गरिरहेका छन्।