हालान्डको कीर्तिमानमा म्यानचेस्टरको सहज जित

काठमाडौं- इंग्लिस प्रिमियर लिग फुटबलमा म्यानचेस्टर सिटीले लिड्स युनाइटेडलाई पराजित गरेको छ। आज बिहान सकिएको खेलमा लिड्स युनाइटेडलाई ३–१ गोल अन्तरले पराजित गर्दै म्यानचेस्टर दोस्रो स्थानमा उक्लिएको हो।

सिटी १५ खेलमा ३५ अंकका साथ दोस्रो स्थानमा रहँदा समान खेलबाट ४० अंक बनाएको आर्सनल शीर्ष स्थानमा रहेको छ। सिटीलाई जिताउनका लागि अर्लिङ हालन्डले २ गोल गर्दा रोड्रिले १ गोल थपेको थियो।

लिड्सका लागि पास्कल स्टुइकले एक गोल फर्काए। पहिलो हाफको अतिरक्त समयको पहिलो मिनेटमा रोड्रीले गोल गर्दै सिटीलाई १–० को अग्रता दिलाएका थिए।

५१औं मिनेटमा हालान्डले गोल गर्दै सिटीको अग्रता दोब्बर बनाए। ६४औं मिनेटमा हालान्डले व्यक्तिगत दोस्रो तथा टोलीका लागि तेस्रो गोल गर्दै सिटीलाई ३–० को अग्रता दिलाए। ७३औं मिनेटमा पास्कलले गोल गर्दै खेललाई ३–१ को स्थितिमा ल्याए पनि जित दिलाउन पर्याप्त रहेन।

पराजित भएको लिड्स १५ अंकका साथ १५औं स्थानमा रहेको छ। यसैबीच, हालन्डले प्रिमियर लिगमा कीर्तिमान पनि कायम गरेका छन्।

लिड्सविरुद्ध २ गोल गरेका उनले सर्वाधिक छिटो प्रिमियर लिगमा २० गोल पूरा गरेका हुन्।खयसै सिजन सिटीमा आवद्ध भएका नर्वेजियन खेलाडी हालान्डले १४ खेलमा २० गोल पुर्‍याएका छन्।