लुम्बिनीमा बढे ११६ प्रतिशत पर्यटक

बुटवल- गौतमबुद्धको पवित्र भूमि लुम्बिनी भ्रमण गर्न आउने पर्यटकको संख्या बढ्न थालेको छ। अंग्रेजी महिनाको अक्टोबर, नोभेम्बर र डिसेम्बर पर्यटकका लागि नेपाल भ्रमण गर्ने उपयुक्त सिजन हो। गत वर्ष कोभिड महामारीका कारण यो सिजनमा सुनसान रहेको लुम्बिनीमा यो वर्ष भने भिडभाड सुरु भएको छ। 

गतवर्षको तुलनामा यो वर्षको अक्टोबर महिनासम्म ११६ प्रतिशत पर्यटक वृद्धि भएको लुम्बिनी विकास कोषका सूचना तथा जनसम्पर्क प्रमुख हरिध्वज राईले जानकारी दिए। 

सन् २०२१ को अक्टोबर महिनासम्म आन्तरिक र बाह्य गरी २ लाख ८९ हजार ६ सय ९५ जनाले लुम्बिनी भ्रमण गरेकोमा २०२२ मा भने संख्या वृद्धि भई ६ लाख २६ हजार ४ सय ५२ पुगेको कोषले जनाएको छ। जनसम्पर्क प्रमुख राईका अनुसार गत वर्ष अक्टोबरसम्म राहदानीबाहक पर्यटक ६ सय ५ जनाले लुम्बिनी भ्रमण गरेकोमा २०२२ मा १३ हजार १ सय ६६ जना पुगेका छन्।