संसदमा खगराज अधिकारीको आरोप- हतियार खरिदमा अर्बौंको चलखेल भइरहेको छ

काठमाडौं- प्रहरीका लागि हतियार खरिदमा कमिसनको चलखेल हुन लागेको भन्दै एमालेले संसदमा बिरोध गरेको छ। 

बुधबार प्रतिनिधि सभा बैठकमा एमाले सांसद खगराज अधिकारीले ग्लोबल टेन्डर नगरीकन इटलीको बदनाम कम्पनी बेरेटामार्फत हतियार खरिद गर्न खोजेको भन्दै आपत्ति जनाएका छन्। 

'सरकारले नाइम एमएम पेस्तोल खरिद गर्न लागेको छ। १ हजार १ सय ५० सट गन खरिद गर्दैछ। २५ सय थान अश्रु ग्याँसको गोलीकठ्ठा सरकारले खरिद गर्दैछ। कुनै पनि ग्लोबल टेन्डर नगरिकन, कुनै पनि सुरक्षा अध्ययन नगरीकन खरिद गर्दैछ,’ उनले भने।

उनले १२ बोरको छर्रा हान्ने बन्दुक किन्न नहुने बताएका छन्। मानव अधिकारको हिसावले पनि सो हतियार किन्न नहुने उनको तर्क छ। 

'यो कसका लागि, कमिसनका लागि या जनताको जीउधनको सुरक्षाका लागि? जनताको जीउधनको सुरक्षा जनताको छातीमा छर्रा हानेर हुन सक्दैन। सुरक्षाविदहरुले समेत छर्रा हुने हतियार खरिद गर्न नहुने र छर्रा हान्न पाइँदैन भनेका छन्। हामी मानव अधिकारको सम्मान गर्ने मुलुकमा पर्छौ, यस्तो ठाउँमा अर्ब भन्दा बढीको कमिसनको खेल भइरहेको छ,' उनले भने।