केन्द्रीय समिति बैठकमा शेखरले भने- देउवाले मेरा पछाडि सुराकी खटाए

काठमाडौं- नेपाली कांग्रेसका नेता शेखर कोइरालाले सभापति शेरबहादुर देउवाले आफ्नो पछाडि सुराकी खटाएको आरोप लगाएका छन्। केन्द्रीय समिति बैठकमा बोल्दै नेता कोइरालाले यस्तो आरोप लगाएका हुन्। 

'महाधिवेशनपछि सभापतिजीले पार्टी एकलौटी ढंगले पार्टी चलाउनु मात्र भएको छैन, मेरो पछाडि सुराकी खटाउनुभएको छ। स्थानीय चुनावमा पनि मेरो पछाडि सभापतिजीले खटाउनुभएका सुराकी थिए,' उनको आरोप छ। 

महाधिवेशपछि देउवा हरेक निर्णयमा हावी भएको समेत उनले आरोप लगाएका थिए। 'महाधिवेशनपछि सभापतिजी एकलौटी ढंगले अघि बढ्नुभएको छ। महाधिवेशनमा हामीलाई ४० प्रतिशत महाधिवेशन प्रतिनिधिले मत दिएका हुन्,' उनले थपे, 'सभापतिजीले ती ४० प्रतिशत महाधिवेशन प्रतिनिधिको भावना विपरीत प्रतिस्पर्धीलाई निरन्तर अन्याय गरिरहनुभएको छ।' 

स्थानीय तहको निर्वाचनमा ठाउँठाउँमा गठबन्धन भएपनि एक्लै लडेको ठाउँमा पार्टीले राम्रो नतिजा ल्याएको उनको भनाइ थियो। 'त्यसैमा पार्टीलाई फाइदा छ। जसरी अहिले गठबन्धनको जगमा कांग्रेस पहिलो पार्टी बनेको प्रचार गरिएको छ, यथार्थ त्यस्तो होइन,' उनले थपे, 'एक्लै लडेका ठाउँमा धेरै जितिएकाले कसरी गठबन्धनको जगमा पार्टी पहिलो बन्यो?'