यी स्थानमा जुनसुकै बेला पनि इन्टरनेट सेवा अवरुद्ध हुनसक्छ

काठमाडौं- इन्टरनेट सेवा प्रदायक संगठन नेपालले विभिन्‍न स्थानमा जुनसुकै बेलामा पनि सेवा बन्द हुने सम्भावना रहेको जनाएको छ।

नेपाल विद्युत प्राधिकरणले विद्युत लाइन काट्ने गरेका कारण इन्टरनेट सेवा अवरुद्ध हुन नदिने ब्याक सिस्टम जडान गरिएको र ब्याकअप सिस्टम धान्‍न छोडेमा कुनै पनि बेला इन्टरनेट अवरुद्ध हुने इन्टरनेट सेवा प्रदायकले जनाएका छन्। 

आईएसपीएनका अनुसार इलाम, विराटनगर, खोटाङ, गाईघाट, इनरुवा, धरान, धुवही, लहान र डोटीमा इन्टरनेट काटिने भएको छ।

आईएसपीएनले भनेको छ, 'पोलभाडा सम्बन्धमा उच्चस्तरीय समितिले दिएको प्रतिवेदन कार्यान्वयन नगरी उल्टो दिशातर्फ गैरकानुनी ढंगले इन्टरनेट प्वाइन्ट- डाटा सेन्टर, पीओपी र दूरसञ्‍चार उपकरण चलिरहेको ठाउँमा घरबेटीसमेतको विद्युत लाइन काट्ने कार्य निरन्तर गरिरहेको छ। यसका लागि ब्याकअप सिस्टम प्रयोग गरिएको भए पनि जुनसुकै बेला जानसक्ने हुन्छ।'